"Junggo ishlar komitéti" ikki Uyghur siyasiy mehbusning jaza mudditi toshup qoyup bérilgen bolushi kéreklikini bildürdi

Amérika dölet mejlisi we memuri da'irilirining "Junggo ishlar birleshme komitéti" xitay da'irilirige xitab qilip, Uyghur siyasiy mehbusliridin mehbube ablesh we abdughéni memtiminning qamaq jaza mudditi toshqanliqi, ularning qanun'gha asasen qoyup bérilgen bolushi kéreklikini bildürdi.
Muxbirimiz erkin
2011-10-21
Élxet
Pikir
Share
Print

Mezkur komitétning ilgiri sürüshiche, "Bölgünchilik" bilen eyiblinip, 3 yilliq qamaq jazasigha höküm qilin'ghan mehbube ableshning qamaq jazasi bu yil 8‏-ayda toshqan. "Chet'elge dölet mexpiyetliki yetküzüsh" bilen eyiblinip, 9 yilliq qamaq jazasigha höküm qilin'ghan abdughéni memtiminning qamaq jazasi toshup, bu yil 7-ayda qoyup bérilishi kérek idi.

Biraq, ularning qoyup bérilgenlikige da'ir héchqandaq shepe yoq. Eger ular qoyup bérilgen bolsa, ularning salametlik ehwali, hazir qeyerde turuwatqanliqigha da'ir tepsilatlar melum emes. Eger qoyup bérilmigen bolsa, ularning néme üchün qoyup bérilmigenliki, xitayning qandaq seweblerni körsitip, ularni dawamliq tutup turuwatqanliqi bir sir.

Mehbube shinjang xelq radi'o istansisining sabiq xizmetchisi bolup, u 2008‏-yili 8‏-ayda xitayning "Qosh tilliq" ma'arip siyasitini tenqid qilip qolgha élin'ghan. Biraq da'iriler uning qandaq jinayet bilen eyiblen'genlikini élan qilmighan idi. Amérikidiki "Di'alog" fondi jem'iyitining kéyin ashkarilishiche, u" Bölgünchilik" bilen eyiblen'gen.

Abdughéni memtimin zhurnalist we oqutquchi bolup, 2002-yili 7‏-ayda qolgha élin'ghan. Kéyinki yili 6‏-ayda qeshqer ottura sot mehkimisi teripidin 9 yilliq qamaq jazasigha höküm qilin'ghan. U "Döletning birlikige tehdit sélish, dölet mexpiyetlikini ashkarilash we chet'elge yollash" bilen eyiblen'gen idi.

Toluq bet