Xelq'ara jinayi ishlar soti kazafiy we uning yéqinliri üstidin tekshürüsh bashliwetti

Liwiyidiki kazafiy hakimiyitige qarshi küchler liwiyining sherqidiki néfit portini kazafiyning qolidin qayturuwaldi.
Muxbirimiz irade
2011.03.03

Roytérsning xewer qilishiche, aldinqi küni kazafiy küchliri 50 ke yéqin tanka bilen portqa basturup kirip, portni égiliwalghan idi. Kéyin portqa yéqin bolghan bin'ghazi we ejdebiye rayonliridin kelgen qarshiliq küchliri kazafiy küchliri bilen toqunushup, portni qayturup alghan. Toqunushlarda eng az dégende 14 kishining ölgenliki, 10 din artuq kishining yaridar bolghanliqi xewer qilinmaqta.

Kazafiyning tinch namayish qilghan xelqqe urush élan qilip, bihude qan tökülüshige seweb bolushi xelq'ara jama'etning naraziliqini qozghimaqta. Kazafiy we uning oghli shundaqla kazafiyning xewpsizlik qisimlirining béshidiki kishiler insaniyetke qarshi jinayet bilen eyibliniwatqan bolup, bügün bu heqte merkizi gollandiyide bolghan xelq'ara jinayi ishlar soti b d t xewpsizlik kéngishining telipige bina'en kazafiy we uning yéqinliri üstidin tekshürüsh bashlighanliqini élan qildi.

Hazir liwiyide toqunushlar dawam qiliwatqan bolup, urushtin qorqup ketken xelq qoshna döletlerge qéchishni dawam qilmaqta. Xelq'ara köchmenler teshkilati 200 mingdin artuq kishining liwiyidin qéchip misir, tunis we négiriyige ketkenlikini bildürdi. Kazafiy bolsa namayishchilarning elqa'ide térrorchiliri ikenlikini ilgiri sürüp, ularning xelqqe wekillik qilalmaydighanliqini we axirqi bir tamche qéni qalghuche ular bilen urush qilidighanliqini jakarlap, eger gherb elliri bu ishqa arilashqan teqdirde minglarche kishining hayatidin ayrilidighanliqini éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.