Чегрисиз мухбирлар тәшкилати ички моңғуллуқ журналист вә кишилик һоқуқ паалийәтчиси хаданиң түрмидин өз вақтида қоюп берилишини тәләп қилди

Мәркизи париждики чегрисиз мухбирлар тәшкилати пәйшәнбә күни баянат елан қилип, хитай даирилиридин җаза муддити тошуш алдидики ички моңғуллуқ журналист вә кишилик һоқуқ паалийәтчиси хаданиң җаза муддити тошқан һаман дәрһал қоюп берилишини тәләп қилди.

2010.11.25

Хада буниңдин 15 йил бурун хитай даирилири тәрипидин " бөлгүнчилик " вә "дөләтниң бирликини парчилашқа урунуш" җинайити билән әйиблинип 15 йиллиқ қамақ җазасиға һөкүм қилинған. Униң җаза муддити 10 ‏- декабир күни тошиду. Чегрисиз мухбирлар тәшкилатиниң әскәртишичә, хитай һөкүмитиниң характеридин алғанда, кишиләр даириләрниң хадани дәрһал қоюп бәрмәсликидин әнсиримәктә икән. Баянатта йәнә, "биз даириләрниң хада қоюп берилгәндин кейин, униң аилиси билән җәм болушиға йол қоюшини тәләп қилимиз". "Биз шундақла йәнә даириләрни моңғул аз санлиқ миллитиниң һоқуқини тор арқилиқ тинч йоллар билән қоғдиған кишиләрни тәқип астиға алмаслиққа чақиримиз" дәп тәкитлигән.

Хитай даирилири йеқинда тор арқилиқ хадани қоллаш һәрикити қозғиған ички моңғуллуқ аял язғучини горуд хучинхуани нәзәрбәнд астиға елип, униң сирт билән болған алақисини үзүп ташлиған иди. Хада 1995‏- йили җәнубий моңғулийә демократик партийисини қуруп, моңғулларниң кишилик вә сияси һәқлирини тәләп қилғандин кейин қолға елинған иди. У 1996‏- йили "бөлгүнчилик" , "дөләтниң бирликини парчилашқа урунуш" вә " җасуслуқ" қилиш қатарлиқ җинайәтләр билән әйиблинип узун йиллиқ қамақ җазасиға һөкүм қилинған. Гәрчә, чәтәлдики ички моңғулийилик тәшкилатлар хадани қутқузуп чиқишқа урунған болсиму, лекин уларниң тәсир күчиниң чәклик болуши қатарлиқ бир қатар сәвәбләрдин хаданиң дилоси хәлқара җәмийәтниң йитәрлик диққитини қозғиялмиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.