Chégrisiz muxbirlar teshkilati ichki mongghulluq zhurnalist we kishilik hoquq pa'aliyetchisi xadaning türmidin öz waqtida qoyup bérilishini telep qildi

Xada buningdin 15 yil burun xitay da'iriliri teripidin " bölgünchilik " we "döletning birlikini parchilashqa urunush" jinayiti bilen eyiblinip 15 yilliq qamaq jazasigha höküm qilin'ghan. Uning jaza mudditi 10 ‏- dékabir küni toshidu. Chégrisiz muxbirlar teshkilatining eskertishiche, xitay hökümitining xaraktéridin alghanda, kishiler da'irilerning xadani derhal qoyup bermeslikidin ensirimekte iken. Bayanatta yene, "biz da'irilerning xada qoyup bérilgendin kéyin, uning a'ilisi bilen jem bolushigha yol qoyushini telep qilimiz". "Biz shundaqla yene da'irilerni mongghul az sanliq millitining hoquqini tor arqiliq tinch yollar bilen qoghdighan kishilerni teqip astigha almasliqqa chaqirimiz" dep tekitligen.

Xitay da'iriliri yéqinda tor arqiliq xadani qollash herikiti qozghighan ichki mongghulluq ayal yazghuchini gorud xuchinxu'ani nezerbend astigha élip, uning sirt bilen bolghan alaqisini üzüp tashlighan idi. Xada 1995‏- yili jenubiy mongghuliye démokratik partiyisini qurup, mongghullarning kishilik we siyasi heqlirini telep qilghandin kéyin qolgha élin'ghan idi. U 1996‏- yili "bölgünchilik" , "döletning birlikini parchilashqa urunush" we " jasusluq" qilish qatarliq jinayetler bilen eyiblinip uzun yilliq qamaq jazasigha höküm qilin'ghan. Gerche, chet'eldiki ichki mongghuliyilik teshkilatlar xadani qutquzup chiqishqa urun'ghan bolsimu, lékin ularning tesir küchining cheklik bolushi qatarliq bir qatar seweblerdin xadaning dilosi xelq'ara jem'iyetning yiterlik diqqitini qozghiyalmighan.