Su chéchish bayrimi küni kambodjada köwrük chüshüp kétip köp adem ölüsh paji'esi yüz berdi

Sherqiy jenubiy asiya ellirining su chéchish bayrimining axirqi küni kambodjada köwrük chüshüp kétish hadisisi yüz bérip, 456 adem ölgen we 700 din artuq adem yarilan'ghan

2010.11.24
Share on WhatsApp
Share on WhatsApp

22-Noyabir küni yeni sherqiy jenubiy asiya ellirining su chéchish bayrimining axirqi küni kambodjada köwrük chüshüp kétish hadisisi yüz bérip, 456 adem ölgen we 700 din artuq adem yarilan'ghan.

Munasiwetlik melumatlargha asaslan'ghanda, bu paji'e 2006- yili mekkide yüz bergen hej pa'aliyitidiki qistangchiliq sewebidin 362 adem ölgen weqedin kéyinki yene bir qétimliq ammiwi pa'aliyet jeryanida köp ademning ölüsh-yarilinish hadisisi hésablinidiken. Kambodja hökümiti bu weqeni kambodjada yüz bergen eng éghir tragédiye dep élan qilip, 25- noyabir künini kambodjada dölet boyiche matem küni dep élan qilip, shu küni dölet bayriqining yérim chüshürülidighanliqini jakarlighan.

 Nöwette bu qétimliq paji'e heqqide xilmu-xil perezler otturigha qoyulmaqta iken. Kambodjaning hökümet melumatlirida déyilishiche, 22-noyabir küni kéchide texminen 3 milyondek kishi paytext pxnom pén shehirige orda aldidiki deryada ötküzülidighan qolwaq musabiqisini körüshke toplan'ghan. Musabiqe ayaghlishishqa az qalghanda kishiler arisida aralgha tutushidighan chong köwrük mustehkem emesken dégen ösek sözning tarqilishi bilen wehime peyda bolup, köwrükte éghir qistangchiliq yüz bergen. Hetta beziler özini köwrük üstidin deryagha étip, téximu köp ademning ölüsh-yarilinish weqesi kélip chiqqan bolushi mumkin iken.

Emma, yene bashqa inkaslardin melum bolushiche, saqchilar köwrük üstidiki qistangchiliqni peseytish üchün, kishiler topigha yuqiri bésimliq su chachqan. Netijide kishiler arisida parakendichilik yüz bérip, nurghunlighan kishiler öz jénini qutuldurush üchün her terepke qachqan. Weqede ölgenlerning köpinchisi dessilip ölgen hem qistangchiliq sewebidin nepsi boghulup ölgen bolushi mumkin iken.

Melum bolushiche , bu qétim ölgenler ichide ayallar nisbeten köp bolup, ölgenler arisida yene kambodjagha sayahet üchün kelgen chet'elliklermu bar iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.