Кишилик һоқуқни көзитиш тәшкилати камбоджаниң мусапирлар сияситини әйиблиди

Кишилик һоқуқни көзитиш тәшкилати чаршәнбә күни камбоджа баш министири хоңсенға хәт йезип, камбоджаниң өткән йили 20 нәпәр уйғур мусапирни хитайға қайтуруветишкә сәвәб болған мусапирлар қануни, камбоджа имза қойған б дт мусапирлар әһдинамисиға уйғун әмәсликини билдүрди.
Мухбиримиз әркин
2010.03.25

Камбоджа баш министири хоңсен 2009 - йили 12 - айниң 17 - күни камбоджаниң мусапирлар салаһийитини бәлгиләш қаидисигә имза қоюп, 20 - числа камбоджаға қечип чиққан уйғур мусапирлиридин 20 кишини хитайға өткүзүп бәргән иди.

Кишилик һоқуқни көзитиш тәшкилати камбоджаниң йеңи мусапирлар қаидисидә камбоджа ички ишлар министирлиқиға б д т мусапирлар ишханисиниң пикирини алмай туруп, мусапирларни бир тәрәп қилиш һоқуқи берилгәнликини, буниң камбоджа имза қойған б д т мусапирлар әһдинамисиға хилап икәнликини илгири сүргән.

Кишилик һоқуқни көзитиш тәшкилатиниң хетидә "сиз мусапирлар һәққидики қошумчә қаидигә имза қоюп 3 күндин кейин, 20 нәпәр уйғур мусапирниң хитайға қайтуруветилгәнликигә даир хәвәрләрдин, қошумчә қаидиниң йитәрсизлик тәрипи биздә әндишә қозғиди" дәп тәкитлигән.

Хитай һөкүмити камбоджаға қечип чиққан 20 нәпәр уйғур мусапирни 20 - декабир күни мәхсус айропиланда хитайға елип кәткән болуп, бу вәқә ғәрб әллири вә хәлқара кишилик һоқуқ тәшкилатлириниң шиддәтлик тәнқидигә учриған иди.

Хитай һөкүмити қайтуруп кәткән 20 мусапирдин 7 кишиниң қануни җазаға тартилғанлиқини билдүргән, лекин уларниң һазир қәйәрдә тутуп турулуватқанлиқи һәққидә учур беришни рәт қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.