Kishilik hoquqni közitish teshkilati kambodzhaning musapirlar siyasitini eyiblidi

Kambodzha bash ministiri xongsén 2009 - yili 12 - ayning 17 - küni kambodzhaning musapirlar salahiyitini belgilesh qa'idisige imza qoyup, 20 - chisla kambodzhagha qéchip chiqqan Uyghur musapirliridin 20 kishini xitaygha ötküzüp bergen idi.

Kishilik hoquqni közitish teshkilati kambodzhaning yéngi musapirlar qa'idiside kambodzha ichki ishlar ministirliqigha b d t musapirlar ishxanisining pikirini almay turup, musapirlarni bir terep qilish hoquqi bérilgenlikini, buning kambodzha imza qoyghan b d t musapirlar ehdinamisigha xilap ikenlikini ilgiri sürgen.

Kishilik hoquqni közitish teshkilatining xétide "siz musapirlar heqqidiki qoshumche qa'idige imza qoyup 3 kündin kéyin, 20 neper Uyghur musapirning xitaygha qayturuwétilgenlikige da'ir xewerlerdin, qoshumche qa'idining yitersizlik teripi bizde endishe qozghidi" dep tekitligen.

Xitay hökümiti kambodzhagha qéchip chiqqan 20 neper Uyghur musapirni 20 - dékabir küni mexsus ayropilanda xitaygha élip ketken bolup, bu weqe gherb elliri we xelq'ara kishilik hoquq teshkilatlirining shiddetlik tenqidige uchrighan idi.

Xitay hökümiti qayturup ketken 20 musapirdin 7 kishining qanuni jazagha tartilghanliqini bildürgen, lékin ularning hazir qeyerde tutup turuluwatqanliqi heqqide uchur bérishni ret qilghan idi.