Kanada bash ministiri xarpér: kanadaning xitay meblighini dölet bixeterlik nuqtisidin turup közitishi zörür

Stéfén xarpérning ilgiri sürüshiche, “Xitay bilen bolghan munasiwetning izchil tereqqiyatigha kapaletlik qilish bilen birge, bu xil munasiwet kanadaning négizlik menpe'itige uyghun bolushi lazim.” u yene, kanada hökümitining xitay bilen munasiwet qilghanda, kanada dölet bixeterlikige chétishliq mesililerge diqqet qilidighanliqini tekitligen.

Afriqidiki sénégalda ziyaret qiliwatqan xarpér, bu sözlerni xitay shirkiti kanada“Néksén” énérgiye shirkitini sétiwalmaqchi bolup, kanada muhit we kishilik hoquq teshkilatlirining küchlük qarshiliqigha uchrighan, oxshashla yene, ottawa hökümiti xitay “Xu'awéy” shirkitining kanada tor alaqe qurulushigha xéridar bolup qatnishishini ret qilidighanliqi heqqide bésharet bergen bir peytte qildi.

Amérika dölet mejlisi yéqinda doklat élan qilip, xitay “Xu'awéy” we “Jongshing” qatarliq ikki éléktronluq alaqe eswabliri shirkitining xitay hökümiti bilen bolghan munasiwiti gumanliq ikenliki, ularning amérikigha meblegh sélishi, amérika karxanilirining ular bilen soda qilishini chekleshni telep qilghan.

Buningdin sel burun, awstraliye hökümiti “Xu'awéy” shirkitining 38 milyard dollar meblegh sélinidighan awstraliye tor alaqe sistémisini kéngeytip qurush qurulushigha xéridar bolup qatnishishini chekligen idi.