Канада баш министири зияритидә нурмуһәммәт ясин мәсилисини оттуриға қоймақчи

Канада баш министири стефен харпер 12 - айниң иккинчи күнидин 6 - күнигичә хитайда дөләт зияритидә болиду. Бу униң 4 йил илгири канада баш министири болуп сайланғандин буянқи тунҗи хитай зияритидур.

Канадаға нәзәр хәвәрләр торида берилгән учурларға қариғанда, канададики уйғур,тибәт вә хитай өктичиләрниң намайиши 1 - декабир канада пайтәхти оттавадики парламент бинаси алдида тинч йосунда елип берилидикән.

Намайишчилар бу нөвәтлик намайиш арқилиқ, канада баш министири стефен харперни хитай зиярити җәрянда кишилик һоқуқ қиммәт қаришида чиң турушқа чақиридикән. Намайишлар йәнә, канада баш министириға хитай билән елип баридиған содида кишилик һоқуқни қайрип қоюшни қобул қилишқа болмайдиғанлиқини билдүридикән.

Стефен харпер канада баш министири болуп сайланғандин буян, хитайдики кишилик һоқуқ дәпсәндичиликини бир қәдәр очуқ рәвиштә әйибләп келиватқан дөләт рәһбәрлириниң бири.

Мәлум болушичә, у бу нөвәтлик хитай зияритидә хитай түрмисидә йетиватқан уйғур язғучи нурмуһәммәт ясин мәсилисини оттуриға қойидикән. Һалбуки, хитай түрмисидики канада пуқраси һүсәйин җелил мәсилисини оттуриға қойидиған яки қоймайдиғанлиқи һазирчә ениқ әмәс.