Үрүмчи шәһири йол яқисидики кәчлик базарларни әмәлдин қалдурушни қарар қилған

Уйғур аптоном райони йәрлик ахбарат васитилириниң ашкарилишичә, үрүмчи шәһири даирилири келәр йилдин башлап йол яқисидики кәчлик базарларни әмәлдин қалдурушни вә буниңдин кейин башқа районлардиму бундақ базарларни тәстиқлимаслиқни қарар қилған.
Мухбиримиз әркин
2010-12-31
Елхәт
Пикир
Share
Принт

Бу һәқтики хәвәрләрдә даириләрниң 28 ‏- декабир күни үрүмчидики базар башқуруш, шәһәр қияпитини башқуруш идариси қатарлиқ мунасивәтлик органларға йол яқисидики кәчлик базарларни тақаш тоғрисида уқтуруш чүшүргәнликини билдүрди.

Лекин хәвәрдә кәчлик базарларни тақиғандин кейин, кәчлик базарда тирикчилик қилип җан бақидиған ушшақ тиҗарәтчиләрниң буниңдин кейинки турмушиға қандақ капаләтлик қилинидиғанлиқи тилға елинмиған. Һөкүмәтниң уқтурушида "пәқәт "кәчлик базар тиҗарәтчилириниң дукан ечип тиҗарәт қилиши, базарға кирип тиҗарәт қилишиға илһам берилидиғанлиқи" тәкитләнгән.

 Хәвәрләрдин мәлум болушичә, даириләрниң кәчлик базарларни тақаш қарариға асасән тәңритағ вә сайбағ районидики "иттипақ миллий өрп-адәтләр кәчлик базири", " 1‏- май кәчлик базири"қатарлиқ уйғурлар тирикчилик қилидиған йол яқисидики кәчлик базарларниң һәммиси тақилидикән. Даириләрниң бу һәқтики уқтурушида кәчлик базарларниң тақилиш сәвәбини чүшәндүрүп, "қатнашниң раван әмәслики, шәһәр қияпити, йемәк- ичмәк вә тазилиқ бихәтәрликигә тәсир көрситидиған амилларни түгитиш" икәнликини илгири сүргән.

Кәчлик базарларни тақаш қарари үрүмчи шәһириниң бу йилниң башлирида бәлгилимә чиқирип, уйғур көчмә нопусиниң үрүмчидә олтурақлишишини қийинлаштурғанлиқи билән мунасивәтлик яки мунасивәтсиз икәнлики айдиң әмәс. Лекин үрүмчи вәзийитидин хәвәрдар затларниң илгири сүрүшичә, даириләр кәчлик базарни тақаш қарари уйғур көчмән нопусиниң контрол қилиш тәдбириниң бир қисми болуп, сирттин кәлгән уйғурларниң турмуш йолини тосуш арқилиқ уларниң үрүмчидә олтурақлишишини контрол қилиштур.

Пикирләр (0)
Share
Толуқ бәт