Xelq'ara kechürüm teshkilati xitay hökümitidin ayallar hoquqi pa'aliyetchisi maw xéngféngni derhal qoyuwétishni telep qildi

Xelq'ara kechürüm teshkilati 6‏-noyabir bayanat élan qilip, xitay hökümitidin bu yil 20‏-séntebir qolgha élin'ghan shangxeylik ayallar hoquqi pa'aliyetchisi maw xéngféngni derhal qoyup bérishni telep qildi.
Muxbirimiz erkin
2012.11.07

Xelq'ara kechürüm teshkilatining asiya ishlirigha mes'ul xadimi rosan rayif, maw xéngféngning bir yérim yilliq emgek bilen özgertish jazasigha höküm qilin'ghanliqini tenqidlep, xitay da'irilirining maw xéngféngni jazalishi lenetleshke tégishlik qilmish. Ular maw xéngféng pash qilghan adaletsizlikni tüzitish ornigha, yene bir qétim basturushni talliwaldi, dégen.

Maw xéngféng, xitayning pilanliq tughut siyasitige qarshi chiqip, ayallarning tughush hoquqigha hörmet qilishni telep qilip nam chiqarghan. Uning yoldishining seyshenbe küni axbarat wasitilirige ashkarilishiche, da'iriler düshenbe küni uninggha ayalining bir yérim yilliq emgek lagéri jazasigha buyrulghanliqini uqturghan. Bu maw xéngféngning jem'iyet tertipige buzghunchiliq qilish bilen eyiblinip, 3‏-qétim qolgha élinishidur. Maw xéngféng, bu qétim özining burun ikki qétim qolgha élin'ghanda kishilik hoquqi depsende qilin'ghanliqini ilgiri sürüp, béyjinggha erz qilip barghan.

Xelq'ara kechürüm teshkilati, maw xéngféngning ten jazasi we qopal mu'amilige uchrash xewpi barliqini agahlandurup, mezkur teshkilat maw xéngféngni wijdan mehbusi, dep qaraydu we xitay hökümitini uni derhal, shertsiz qoyup bérishke chaqiridu, dep tekitligen.

Maw xéngféngning yoldishi roytérs agéntliqigha élan qilghan bayanatida ayalining gunahsiz ikenlikini bildürüp, u héchqandaq qanun'gha xilapliq qilmidi. Ular jinayet oydurup, pakitni yasap chiqip, héchqandaq jinayet sadir qilmighan kishilerni türme we emgek lagérigha tashlawatidu, dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.