Xelq'ara kechürüm teshkilati xitayni kishilik hoquq adwokatlirigha parakendichilik sélish, ten jazasi bérish bilen tenqid qildi

Mezkur teshkilat bu heqtiki doklatida “Xitay da'irilirining kishilik hoquq adwokatliri we bashqa qanun mulazimiti bilen shughullinidighan kishilerni qoghdashqa kapaletlik qilmayla qalmay, eksiche qanuni, memuri we emeliy wasitilerni qollinip, ularning xizmitige buzghunchiliq qiliwatqanliqi”ni ilgiri sürgen.

Doklatta eskertip, “Eger adwokatlar we qanun xizmetchilirining resmiy da'iriler teripidin sadir qilin'ghan kishilik hoquq buzghunchiliqini sürüshtürüshke qurbi yetmise, xitayda kishilik hoquqni ünümlük qoghdighili bolmaydu” dep tekitligen.

Xelq'ara kechürüm teshkilatining eskertishiche, xitay hökümiti adwokatlarning dölettiki musteqil bir gewde ikenlikini étirap qilishi kérek. Lékin xitay tashqi ishlar ministirliqi bayanatchisi xung léy shu küni kishilik hoquq teshkilatining doklatigha inkas qayturup, “Junggo qanun bilen idare qilinidighan dölet” we “Atalmish mejburiy ghayib bolush we xalighanche tutqun qilish mewjut emes” dégen.

Doklatta yene, bu yil 2‏-aydin buyan 130din artuq pa'aliyetchi we kishilik hoquq adwokatining iz ‏-déreksiz yoqap ketkenliki bildürülgen. Mezkur teshkilatning ilgiri sürüshiche, xitayda 204 ming adwokat bolsimu, lékin ulardin kishilik hoquq délosi qobul qilidighan adwokatlar peqet 300 etrapida iken.