Б д т кишилик һоқуқ кеңиши қазақистанниң уйғур мусапирлирини хитайға қайтуруш қилмишидин қайғурғанлиқини билдүрди

Б д т кишилик һоқуқ кеңишиниң бир мутәхәссисләр комитети тәйярлиған доклатта, қазақистанниң хәлқара пуқралиқ вә сиясий һәқләр әһдинамисини иҗра қилиш әһвали көздин кәчүрүлүп, униң болупму сиясий панаһлиқ вә мусапирлиқ салаһийитигә тошидиған өзбек вә уйғурларни дөлитигә қайтуруп, мусапирларни кишилик һоқуқи дәпсәндичиликкә учраш еһтималлиқи мәвҗут дөләтләргә қайтурмаслиқ тоғрисидики хәлқара принсипларға хилаплиқ қилғанлиқидин илгириләп қайғурғанлиқини ипадилигән.

Доклатта, шаңхәй һәмкарлиқ тәшкилатиға әза қазақистанниң мәзкур тәшкилат рамкиси ичидә бәргән дипломатик вәдисигә асасән, мусапирларни тән җазаси вә еғир кишилик һоқуқ дәпсәндичилики рой бериватқан бу дөләтләргә өзи халап қайтуруватқан болуши мумкинликини әскәртип, қазақистан даирилирини хәлқара әһдинамиләргә риайә қилишқа чақирған.

Мәркизи нюйорктики “җуңго кишилик һоқуқ тәшкилати” қазақистанниң йеқинда әршидин исраилни хитайға қайтурувәткәнликини шундақла йәнә, 28 нәпәр өзбек мусапирни өзбекистанға қайтуруп бәргәнликини әскәртип, б д т кишилик һоқуқ кеңишиниң мәзкур доклатидики тәклип пикирләрни қарши алидиғанлиқини билдүрди.