Кишилик һоқуқни көзитиш тәшкилати қирғиз һөкүмитини өзбекләрниң адовкатлирини қоғдашқа чақирди

Кишилик һоқуқни көзитиш тәшкилати бүгүн баянат елан қилип, қирғиз һөкүмитини 2010-йили йүз бәргән етник тоқунушта зиянкәшликкә учриған өзбекләрниң давасини қобул қилған адвокатларниң бихәтәрликини қоғдашқа чақирди.
Мухбиримиз ирадә
2011.08.04

Баянатта ейтилишичә, йеқинқи 10 ай ичидила қирғизистандики етник қирғинчилиққа аит җинайи даваларда өзбекләрниң давасини үстигә алған адвокатлар бир қанчә қетим намәлум кишиләрниң һуҗумиға учриған. Баянатқа қариғанда, авғуст татяна томина исимлик адвокат соттин чиқип кетип барғинида, у сот хадимлири, зиярәтчиләр вә бир қанчә сақчиларниң алдидила 4 аял кишиниң һуҗумиға учриған.

Кишилик һоқуқни көзитиш тәшкилати баянатида, мәзкур тәшкилатниң татяна башлиқ барлиқ адвокатларниң бихәтәрликидин әнсирәватқанлиқини билдүрди вә қирғиз һөкүмитини дәрһал бу һуҗумчиларни қануний җавабкарлиққа тартишқа вә адвокатларниң бихәтәрликигә капаләтлик қилишқа чақирди.

2010-Йили 6-айда қирғизлар билән өзбекләр арисида йүз бәргән етник тоқунушта зиянкәшликкә учриғучиларниң көпинчиси өзбекләрдин болуп, 200 дин артуқ киши һаятидин вә 400 миңдин артуқ адәм өй-маканлиридин айрилған иди.

Хәлқара кишилик һоқуқ органлири вәқәдин кейин районда елип барған тәкшүрүшлири нәтиҗисидә, вәқәниң бундақ зорийип кетишидә һөкүмәтниңму мәсулийити барлиқини ейтқан. Әмма, қирғиз һөкүмити бу әйибләшләрни рәт қилип келиватқан иди.

Мунасивәтлик хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.