مەكتۇپتا، بىرلەشكەن دۆلەتلەر تەشكىلاتى كىشىلىك ھوقۇق كېڭىشىنىڭ تۆتىنچى نۆۋەتلىك كىشىلىك ھوقۇق تەكشۈرۈش يىغىنىدا خىتاينىڭ كىشىلىك ھوقۇق خاتىرىسى ئوچۇق - ئاشكارا تەكشۈرۈلىدىغانلىقى ئىلگىرى سۈرۈلگەن ۋە "بىز جانابلىرى ھۆكۈمىتىنىڭ بۇ مەزكۇر پائالىيەت جەريانىدىكى سوراق قىلىش ۋە تەكلىپ بېرىش جەريانىغا ئاكتىپ قاتنىشىشىنى كۈچلۈك تەلەپ قىلىمىز" دېيىلگەن.
توم لانتوس كىشىلىك ھوقۇق كومىتېتىنىڭ رەئىسى جەيمىس مېكگوۋېرن باش بولۇپ يوللىغان مەكتۇپتا، 27 - يانۋار مەزكۇر كومىتېتتا چاقىرىلغان خىتايدىكى كىشىلىك ھوقۇق دەپسەندىچىلىكىگە ئائىت گۇۋاھلىق بېرىش يىغىنىدا، گۇۋاھلىق بەرگەن شەخسلەرنىڭ خىتايدا سىرتقا قارىتا تاقالغان ئۇيغۇر ئېلى ۋە تىبەتلەرنىڭ كىشىلىك ھوقۇق ئەھۋالىنى بىرلەشكەن دۆلەتلەر تەشكىلاتى تەكشۈرگۈچىلىرىنىڭ مۇستەقىل تەكشۈرۈش ئېلىپ بېرىشنى تەلەپ قىلغانلىقى ھەمدە ئۇلارنىڭ يەنە بىرلەشكەن دۆلەتلەر تەشكىلاتى كىشىلىك ھوقۇق كېڭىشى خىتاينىڭ كىشىلىك ھوقۇق ئەھۋالى ئۇستىدىن ئېلىپ بارىدىغان تەكشۈرۈش يىغىنىغا ئامېرىكا تەرەپنىڭ ئىشتىراك قىلىشىنىڭ بەكلا مۇھىم ئىكەنلىكىنى قايتا تەكىتلىگەنلىكى كۆرسىتىلگەن.
مەكتۇپتا، بۇ نۆۋەتلىك يىغىننىڭ ئامېرىكا ھۆكۈمىتىنىڭ كىشىلىك ھوقۇقنى قوغداشتا دۇنياۋى يېتەكچىلىك ئورنىنىڭ تېخى ئاياغلاشمىغانلىقىنى خەلقئارا جەمئىيەتكە نامايان قىلىدىغان ئىنتايىن مۇھىم پۇرسەت بىلەن تەمىن ئېتىدىغانلىقى ئىلگىرى سۈرۈلگەن.
مەكتۇپتا يەنە، خىتاينىڭ بۇ خىلدىكى تەكشۈرۈشلەردىن ئۆزىنى قاچۇرۇش ھەمدە خىتايدىكى چەكسىز كىشىلىك ھوقۇق دەپسەندىچىلىكىنى يوشۇرۇپ قېلىشى مەقسىتىدە، ئىقتىسادى جەھەتتە بېسىم ئىشلىتىشكە ئوخشاش دىپلوماتىك ۋاسىتىلەرنى ئىشقا سېلىپ، ئۆزىنى قوللايدىغان دۆلەتلەر سانىنى كۆپەيتىپ كەلگەنلىكى، بۇنىڭدىن خىتاينىڭ نۆۋەتتە ئېچىلىش ئالدىدا تۇرغان يىغىغا قانچىلىك دەرىجىدە جىددىي مۇئامىلە قىلىدىغانلىقىنى كۆرسىتىدىغانلىقىنى ئوتتۇرىغا قويۇلغان.
مەكتۇپنى مەزكۇر كىشىلىك ھوقۇق كومىتېتى رەئىسى جەيمىس مېكگوۋېرن، ھەمدە ئەزالىرىدىن جەنىس شاكوۋسكي ۋە تەممي بالدۋىن قاتارلىق بەش كىشى ئىمزا قويۇپ 30 - يانۋار ئامېرىكا پرېزىدېنتى باراك ئوباما، ۋە تاشقى ئىشلار مىنىستىرى خىللارىي كلىنتون خانىملارغا يوللىغان.