Uyghur élidiki shénxu'a kömür kan shirkitining sabiq bash mudiri parixorluq bilen eyiblendi

Tünügün béyjingdiki ottura xelq soti teripidin körülgen dawada uning Uyghur élidiki kömür kan shirkitide rehberlik wezipisi ötewatqan mezgilde shirket maliyisidin 30 milyon som xiyanet qilip, shexsi qoru-jay alghanliqi we shundaqla bir qisim tijaret türlirige meblegh salghanliqi, hoquqidin paydilinip bashqilardin zor miqdarda para alghanliqi bildürülgen.

Xitayda chiqidighan xelq kündilik gézitining xewiridin qarighanda, bu yil 57 yashqa kirgen lyu bokun xébiyliq bolup, u 2005-yilidin 2008-yilighiche bolghan ariliqta Uyghur élidiki eng chong kömür kan shirkiti bolghan shénxu'a shirkitining bash mudiri bolup turghan. U 2011-yili 23 ‏-martta béyjing jama'et xewpsizlik tarmaqliri teripidin qolgha élin'ghan bolup, uning dawasi üstide tekshürüsh dawam qiliwatqan iken.

Xitay hökümiti 18-qurultay harpisida, özlirining atalmish “Pakliq qurulushi” gha köngül bölüwatqanliqini namayan qilish üchün xiyanetchilik, parixorluq bilen shughullan'ghan bir türküm kishilerni tekshürüp bir terep qildi. Emma chet'eldiki Uyghur közetküchiler, Uyghur élide xizmet qiliwatqan herqandaq bir xitay emeldar üchün xiyanetchilik qilishning adettiki bir ehwal ikenlikini, yuqiriqidek jazalan'ghanlarning peqetla chong xiyanetchilerni qoghdash yolida qurban qilin'ghanlar ikenlikini bildürüshmekte.