Qumulda qimmiti 50 milyard yüendin ashidighan mis - nékil roda kénida ish bashlandi

Xitay da'iriliri Uyghur aptonom rayonining tebi'iy bayliqlirini échish qurulushini tiz sür'et bilen élip barmaqta. Tengritagh xewerler toridin melum bolushiche, qumulgha jaylashqan xu'angshen mis - nékil kanining künde 4000 tonna ruda ayrish qurulushida resmiy ish bashlan'ghan.
Muxbirimiz irade
2010.06.10

Bu kan qumul shehirining sherqiy jenubidin 130 kilométir yiraqliqqa toghra kélidighan yerge jaylashqan bolup, Uyghur rayonidiki renglik métal zapisi eng köp kan hésablinidiken.

Kan rayonida hazir bayqalghan mis - nékil roda zapas miqdari 84 milyon tonna, nékil miqdari 380 ming tonna, mis miqdari 220 ming tonna, kubalt miqdari 32 ming tonna iken. Buning iqtisadiy qimmiti 50 milyard yüendin ashidiken.

Téxi yéqindila qumulda qimmiti 200 milyard yüendin ashidighan molbidin zapisi bayqalghan idi. Igilinishiche, qumul renglik métallar, kem uchraydighan métallar, ximiyiwi we qurulush matériyalliri qatarliq köp xil türlerni öz ichige alghan mol kan bayliqigha ige rayon iken.

Qumuldin qéziliwatqan kömürmu zor salmaqni igileydighan bolup, qumulning kömür mehsulatliri uzundin buyan gherbning kömürini sherqqe toshush pilani boyiche xitay ölkilirige toshulmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.