Кишилик һоқуқ органлири ливийидә әсирләргә инсаний муамилә қилиш һәққидә чақириқ елан қилди

Пәйшәнбә күни кишилик һоқуқни көзитиш тәшкилати вә хәлқара кәчүрүм тәшкилатиға охшаш кишилик һоқуқ органлири ливийидики өткүнчи һөкүмәтни халиғанчә тутқун қилиш вә тутқунларға тән җазаси бериш һәрикәтлириниң алдини елишқа, казафийниң қолға чүшкән қоллиғучилириға вә казафийниң юртдашлириға инсаний муамилә қилиш һәққидә агаһландурди.
Мухбиримиз ирадә
2011.10.13

Б б с ниң хәвәр қилишичә, мәркизи лондондики бир мәхпий тәкшүрүш оргини тәйярлиған доклатида, йеқиндин буян ливийидә қолға елинған миңларчә кишиниң тән җазаси вә қопал муамилигә учриғанлиқиға аит испатларға еришкәнликини ашкарилиған.

300 Дәк киши билән елип берилған сөһбәт нәтиҗисидә һазирланған доклатта, әсиргә елинған казафийниң һимайичилириниң искәнҗигә елинғанлиқи, бәзи тутуп туруш орунлирида қийнаш сайманлириниң байқалғанлиқи мәлум қилинған.

Доклатта ейтилишичә, икки гундипай әсирләрни иқрар қилдуруш үчүн қийнаш васитиси қолланғанлиқини қобул қилған.

Хәлқара кәчүрүм тәшкилати әскәртип : ливийидә һазир вәзийәтниң интайин қалаймиқанлиқини чүшинишкә болиду, әмма бу хил әһвалға сәл қаралса, бу, йеңи ливийиниң казафий дәвридики ливийидин анчә пәрқи болмайдиғанлиқидәк хата бир чүшәнчини пәйда қилип қойиду, шуңа өткүнчи һөкүмәт бу нуқтиға алаһидә диққәт қилиши, өтмүшкә әмәс, кәлгүсигә қариши керәк, дегән пикирни илгири сүргән.

Ливийә өткүнчи һөкүмитиму бүгүн бу чақириқларға җаваб қайтуруп, бу әһвални дәрһал сүрүштә қилидиғанлиқини вәдә қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.