Хәлқара кәчүрүм тәшкилати хитайдики мәҗбурий өй чеқиш қилмишини әйиблиди

Хәлқара кәчүрүм тәшкилатиниң доклатида, 2009-йилдин 2011-йилғичә хитайда йүз бәргән мәҗбурий өй чеқиш вәқәлиридин 41 қетимлиқ вәқә үстидики тәкшүрүш оттуриға қоюлған. Доклатта йәнә буларниң ичидә өй чеқишқа наразилиқ билдүрүш җәрянида йүз бәргән 9 кишиниң өлүм сәвәби оттуриға қоюлуп, хитайда давамлишиватқан пуқраларни өйлиридин мәҗбурий көчүрүш, деһқанларниң йәр-земинлирини тартивелиш җәрянидики зораванлиқ қилмишлири әйибләнгән.

Йеқинқи йиллардин буян, хитайда пуқраларни туралғу өйлиридин мәҗбурий көчүрүш, пуқраларниң өйлирини мәҗбурий чеқиветиш қилмишлири көпәйгән.

Хитай пуқралириниңму бу хил қилмишқа болған наразилиқ һәрикәтлири көпәйгән. Радиомиз игилигән учурлардин мәлум болушичә, чаршәнбә күни чеңду шәһири шуаңлию наһийилик һөкүмәт кадир вә сақчилардин 100 дин артуқ адәмни тәшкилләп, топа иттириш машинилири билән деһқанларниң терилғу йәрлирини түзлимәкчи болғинида, кәнттики деһқанларниң қаршилиқиға учриған.

Мәлум болушичә, кәнттики деһқанлар билән наһийидин кәлгән кадир, сақчилар оттурисидики тоқунуш пәйшәнбә күниму давамлишиватқан болуп, һазирғичә тоқунушта икки адәм яриланған.