Béyjingda mélamin weqeside salametliki ziyan'gha uchrighan balilarning ata - aniliri tutqun qilindi

Béyjing sheherlik saqchi idarisi axbarat élan qilish yighini chaqirishni pilanlighan a'ililerdin 5 neper ata - anini yéngi yilda tutqun qilghan bolup, béyjing shehirining dashing nahiyisidiki bir emgek bilen özgertish lagérigha solap qoyghan.

Perzentliri ziyan'gha uchrighan 12 a'ile 2 ‏- yanwar küni béyjing shehirining gu'ang'en yolidiki bir méhmanxanida axbarat élan qilish yighini chaqirishni pilanlighan we muxbirlargha uqturush tarqatqan idi.

Ata ‏- anilarni tutqun qilish weqesi xébéy ölkisining shijyaju'ang shehiridiki bir sot mehkimisi " üch bugha" süt mehsulatlar shirkitining bash mudiri tyen wénxu'a we uning yandashlirini mélamin weqeside jawabkarliqi bar, dep sotlawatqan bir mezgilde yüz berdi.

Béyjing géziti jüme künki bir xewiride eger tyen wénxu'a qatarliqlarning jinayiti muqimlashsa muddetsiz qamaq jazasigha höküm qilinidighanliqini ilgiri sürgen. Dashing nahiyisidiki emgek bilen özgertish lagérigha solap qoyulghan ata - anilardin oghlining börikige tash chüshken bir erizdar, roytérs agéntliqigha bergen bayanatida "biz hazir a'ile nezerbentide tutup turuluwatimiz, ular bizni néme üchün nezerbent astida tutup turghanliqini chüshendürmidi" dep tekitligen.

Axbarat yighini uyushturghan 5 neper ata - ana nezerbent qilin'ghan bolsimu, lékin qalghan ata ‏- anilar jüme küni axbarat élan qilish yighini ötküzüp, jem'iyetni balilargha köngül bölüshke chaqirghan, lékin shu küni üch bugha shirkitige qarshi qurulghan tor békiti tosuwétilgen.

Üch bugha shirkitini öz ichige alghan 22 süt mehsulatlar karxanisi yéngi yilda kishilerge téléfon tékisti yollap, özlirini epu qilishi we kechürüshini telep qildi.