Uyghur meshripi b d t 'jiddiy qoghdilidighan gheyri maddiy medeniyet mirasi' tizimlikige kirgüzüldi

Uyghur meshripi birleshken döletler teshkilatining "jiddiy qoghdilidighan gheyri maddiy medeniyet mirasi" tizimlikige kirgüzüldi. N p r agéntliqining xewer qilishiche, nayrobida échilghan b d t pen medeniyet teshkilati gheyri maddiy medeniyetlerni qoghdash komitétining 15 - noyabir küni testiqlishi bilen Uyghurlarning milliy muzika we usulluq yighilishi bu tizimlikke kirgüzüldi.
Muxbirimiz irade
2010-11-18
Share

B d t gheyri maddiy medeniyetlerni qoghdash komitétining mes'ul xadimi frank proscheynning n p r gha bildürüshiche, bu tizimlikke kirgüzülgen milliy medeniyetler adette dunya jama'etchiliki teripidin anche bilinip ketmeydighan, emma jiddiy qoghdilishqa tégishlik bolghan milliy medeniyetler bolup, bu tizimlikke kirgüzülgen medeniyetler hemmisi dunya jama'etchilikining diqqitige we qoghdishigha érishidiken.

Igilinishiche, xitay medeniyet ministirliqi bu yil 4 tür boyiche bu komitétqa iltimas sun'ghan bolup, Uyghur meshripidin bashqa "junggo su ötmes ayropilan bölmisi yasash téxnikisi" we "mix metbe'e téxnikisi" qatarliq 3 tür b d t ning testiqlishigha érishken.

N p r muxbiri komitét mes'ul xadimi frank proscheyttin, "menche nurghun kishiler buni körgende xitay hökümiti Uyghurlarning medeniyitini yoq qilishqa urunuwatqan idighu, qandaq bolup uni yene qoghdashqa iltimas qilidu? dep sorishi mumkin, siz buninggha néme dep jawab bérisiz" dep sorighan.

Frank proscheyt buninggha jawaben: "bir jehettin élip éytiqanda, bu qedimiy örp - adet we medeniyetlerge yoshurun'ghan bir xil xasiyetni körsitip béridu. Yeni hökümetler bizning komitétimizgha iltimas yollash arqiliq, özining heqiqeten milliy medeniyetlerni yéterlik qoghdiyalmaywatqanliqini, ularning hazirqi ijtima'iy iqtisadiy weziyetning xirisigha duch kéliwatqanliqini bildüridu. Yeni bu jehette heqiqeten mesilisining barliqini qobul qilidu" dep jawab bergen.

Birleshken döletler teshkilatining "jiddiy qoghdilidighan gheyri maddiy medeniyet mirasi" tizimlikige bundin ilgiri Uyghur 12 muqami élin'ghan idi. Meshrep bu tizimlikke kirgen ikkinchi Uyghur medeniy yadikarliqi bolup hésablinidu.
 
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.