سىنئالغۇ يىغىنى خىتاي مەركىزى كومىتېت تەشۋىقات بۆلۈمى، بىرلىكسەپ بۆلۈمى ۋە دۆلەتلىك مىللىي ئىشلار كومىتېتى تەرىپىدىن چاقىرىلغان بولۇپ، يىغىندا دۆلەتلىك مىللىي ئىشلار كومىتېتىنىڭ مۇدىرى ياڭ جىڭچياڭ، بۇ پائالىيەتنى "ئىسلاھات، تەرەققىيات نەتىجىلىرىدىن ھەر مىللەت ئاممىسىنى بەھرىمان قىلىشنى چۆرىدەپ قانات يايدۇرۇش، مىللىي سىياسەتنى ئىزچىللاشتۇرۇش، ئاز سانلىقلارنىڭ قانۇنى ھوقۇق - مەنپەئەتىنى قوغداشنى چۆرىدەپ قانات يايدۇرۇش"نى تەكىتلىگەن. لېكىن ياڭ يەنە، بۇ پائالىيەتنى جەمئىيەت مۇقىملىقى ۋە دۆلەتنىڭ بىرلىكىنى قوغداشنى چۆرىدەپ قانات يايدۇرۇش كېرەكلىكىنى ئىلگىرى سۈرگەن.
خىتاي كومپارتىيىسى ۋە مەركىزى ھۆكۈمىتى بۇ يىل 5 - ئايدا "شىنجاڭ خىزمەت يىغىنى " چاقىرىپ، ئۇيغۇر ئىلىدە ئىقتىسادنىڭ تەرەققىياتىنى تېزلىتىدىغانلىقىنى ئېلان قىلغان. لېكىن تەرەققىياتتىن يەرلىك خەلقنى قانداق بەھرىمەن قىلىدىغانلىقىغا دائىر كونكرېت پىلان ئوتتۇرىغا قويمىغان ئىدى.