خىتاي ئۇيغۇر ئېلىدىن كېلىپ مىسىردا ئوقۇۋاتقان ئوقۇغۇچىلارنى مۇكاپاتلىدى

خىتاينىڭ مىسىردا تۇرۇشلۇق ئەلچىخانىسى 26-يانۋار كۈنى ئۇيغۇر ئېلىدىن كېلىپ ئۆز خىراجىتى بىلەن مىسىردا ئوقۇۋاتقان مۇنەۋۋەر ئوقۇغۇچىلارنى مۇكاپاتلاش پائالىيىتى ئۆتكۈزگەن. پائالىيەتكە 100 گە يېقىن ئوقۇغۇچى ۋەكىللىرى قاتناشقان.
مۇخبىرىمىز ئىرادە
2013-01-31
ئېلخەت
پىكىر
Share
پرىنت

مىسىردىكى خىتاي ئەلچىخانىسى بۇنداق پائالىيەتنى 2011-يىلىدىن تارتىپ تەسىس قىلغان بولۇپ، ھازىر تېخىمۇ كۆپ دۆلەتلەرگە كېڭەيتىلدى. خىتاي ھۆكۈمىتىنىڭ مەخسۇس ھالدا ئۇيغۇر ئېلىدىن ئۆز خىراجىتى بىلەن چەتئەللەردە ئوقۇۋاتقان ئوقۇغۇچىلارنى مۇكاپاتلىشى ۋە بۇ مۇكاپاتنىڭ مەقسىتى چەتئەللەردىكى ئۇيغۇرلار ئارىسىدا كۈچلۈك مۇنازىرە پەيدا قىلغان ئىدى.

خىتايدىكى شىنجۇ مائارىپ تورىنىڭ خەۋەر قىلىشىچە، خىتاي باش ئەلچى سۇڭ ئەيگو مۇكاپات تارقىتىش مۇراسىمىدا قىلغان سۆزىدە ئۇيغۇر ئېلىدىن كەلگەن ئوقۇغۇچىلارغا مۇكاپات تارقىتىشنىڭ مەقسىتىنى ۋەتەننىڭ غەمخورلۇقىنى يەتكۈزۈش، دەپ شەرھلىگەن. ئۇ شۇنداقلا ئوقۇغۇچىلارنى مەكتەپ پۈتتۈرگەندىن كېيىن ۋەتەنگە قايتىپ، ۋەتەن ۋە يۇرت ئۈچۈن خىزمەت قىلىشقا چاقىرغان.

بۇنداق مۇكاپات تارقىتىش مۇراسىملىرى ئىلگىرى ياپونىيە، سۈرىيە، تۈركىيە ۋە ھەتتا سەئۇدى ئەرەبىستاندىمۇ ئۆتكۈزۈلگەن. ئۇيغۇر كۆزەتكۈچىلەر تۇيۇقسىزلا ئوتتۇرىغا چىققان بۇ ئوقۇش ياردەم پۇلىنىڭ چەتئەللەردىكى ئۇيغۇر ياشلىرىنى كونترول قىلىشتىن ئىبارەت سىياسىي مەقسەتتە تارقىتىلىۋاتقانلىقىنى بىلدۈرمەكتە.

پىكىرلەر (0)
Share
تولۇق بەت