Хитай москвада йүз бәргән партлаштин кейин бейҗиң, шаңхәй шәһәрлиридә бихәтәрликни күчәйтти

Йәнә бәзи хәвәрләрдә, даириләрниң шаңхәй шәһиридә уйғурларға ятақ беришни чәклигәнликини, уйғурларниң шаңхәйдин қоғлиниватқанлиқини, хитай һөкүмитиниң бу тәдбирни йеқинда ечилидиған шаңхәй хәлқара йәрмәнкисиниң бихәтәрликини сақлаш үчүн йолға қойғанлиқини илгири сүргән. Лекин йәрлик даириләр меһманханиларға уйғурларға ятақ бәрмәслик тоғрисида уқтуруш чиқирилғанлиқини рәт қилди.

Дүшәнбә күни москва йәр асти пойизида өзини өлтүрүвелиш характерлик партлитиш вәқәси йүз берип, 30 дин артуқ адәм өлгән, 60 дин артуқ адәм яриланған иди. Шинхуа агентлиқиниң бу һәқтики хәвиридә әскәртишичә, бейҗиң шәһәрлик сақчи идарисиниң башлиқи фу җеңхуа "сақчиларниң апшарка итларниң ярдимидә пойиз бекити қатарлиқ җайларда чарлашни күчәйткәнлики, гуманлиқ кишиләрни тохтитип, сорақ қиливатқанлиқи вә тәкшүрүватқанлиқи"ни билдүргән. Шаңхәй шәһириниң муавин шәһәр башлиқи яң шюң шаңхәй хәлқара йәрмәнкиси мәзгилидә бихәтәрлик тәдбирини күчәйтип, рентгин җиһазлириниң көпәйтилидиғанлиқини, зиярәтчиләрниң нәрсә ‏ - керәклирини тәкшүридиғанлиқини тәкитлигән.

Хитай 2008‏ - йили бейҗиң олимпик мусабиқисиниң алди - кәйнидә бейҗиң, шаңхәй қатарлиқ шәһәрләрдә бихәтәрликни күчәйтип, уйғур вә тибәтләрниң үстидин назарәт елип барған иди.