Xitay moskwada yüz bergen partlashtin kéyin béyjing, shangxey sheherliride bixeterlikni kücheytti

Yene bezi xewerlerde, da'irilerning shangxey shehiride Uyghurlargha yataq bérishni chekligenlikini, Uyghurlarning shangxeydin qoghliniwatqanliqini, xitay hökümitining bu tedbirni yéqinda échilidighan shangxey xelq'ara yermenkisining bixeterlikini saqlash üchün yolgha qoyghanliqini ilgiri sürgen. Lékin yerlik da'iriler méhmanxanilargha Uyghurlargha yataq bermeslik toghrisida uqturush chiqirilghanliqini ret qildi.

Düshenbe küni moskwa yer asti poyizida özini öltürüwélish xaraktérlik partlitish weqesi yüz bérip, 30 din artuq adem ölgen, 60 din artuq adem yarilan'ghan idi. Shinxu'a agéntliqining bu heqtiki xewiride eskertishiche, béyjing sheherlik saqchi idarisining bashliqi fu jéngxu'a "saqchilarning apsharka itlarning yardimide poyiz békiti qatarliq jaylarda charlashni kücheytkenliki, gumanliq kishilerni toxtitip, soraq qiliwatqanliqi we tekshürüwatqanliqi"ni bildürgen. Shangxey shehirining mu'awin sheher bashliqi yang shyung shangxey xelq'ara yermenkisi mezgilide bixeterlik tedbirini kücheytip, réntgin jihazlirining köpeytilidighanliqini, ziyaretchilerning nerse ‏ - kéreklirini tekshüridighanliqini tekitligen.

Xitay 2008‏ - yili béyjing olimpik musabiqisining aldi - keynide béyjing, shangxey qatarliq sheherlerde bixeterlikni kücheytip, Uyghur we tibetlerning üstidin nazaret élip barghan idi.