'مۇھەببەتنىڭ ئون شەرتى' ناملىق ھۆججەتلىك فىلىم ئامېرىكىدا تۇنجى قېتىم كۆرسىتىلمەكچى

ئۇيغۇر مىللىي ھەرىكىتى يېتەكچىسى رابىيە قادىر خانىم ئاتلانتادا ئېچىلىدىغان فىلىم فېستىۋالىغا قاتنىشىش ئۇچۇن يۈرۈپ كەتتى.

بۇ، "مۇھەببەتنىڭ ئون شەرتى" ناملىق ھۆججەتلىك فىلىمنىڭ تۇنجى قېتىم ئامېرىكىدا كۆرسىتىلىشى بولۇپ ھېسابلىنىدۇ.

فىلىم فېستىۋالىغا ئائىت ئۇچۇرلاردىن مەلۇم بولۇشىچە، "مۇھەببەتنىڭ ئون شەرتى" 19 ‏- ئاپرېل كەچقۇرۇن ئاتلانتا شەھىرىدىكى "مىدتوۋن بەدىئىي فىلىملەر كىنوخانىسى"دا قويۇلىدىكەن.

مەلۇم بولۇشىچە، فېستىۋال تەشكىللىگۈچىلىرى فىلىم كۆرسىتىلىپ بولغاندىن كېيىن رابىيە قادىر خانىم بىلەن سۆھبەت ۋە فىلىم ھەققىدە CNN قاتارلىق ئاخبارات ۋاسىتىلىرىدە مەخسۇس زىيارەت ئۇيۇشتۇرۇشقا تىرىشچانلىق كۆرسەتمەكتە ئىكەن.

19 - ئاپرېل ئەتىگەندە دۇنيا ئۇيغۇر قۇرۇلتىيى رەئىسى رابىيە قادىر خانىم ئاتلانتا شەھىرىگە يېتىپ كەلدى. ئاتلانتا فىلىم فېستىۋالىغا قويۇلغان بارلىق فىلىملەر مەزكۇر شەھەردىكى مىدتوۋن كىنوخانىسىدا كۆرسىتىلىدىكەن.

"مۇھەببەتنىڭ ئون شەرتى" بۇلتۇر كۈزدە ئاۋسترالىيىدە ئۆتكۈزۈلگەن مېلبۇرن فىلىم فېستىۋالىغا قۇيۇلغان ۋە رابىيە خانىمنىڭ مەزكۇر فېستىۋالغا تەكلىپ قىلىنىشى ئاۋسترالىيە ‏ - خىتاي مۇناسىۋەتلىرىدە سوغۇقچىلىق پەيدا قىلغان ئىدى.