Muqam ansambili dohada konsért bérishke bashlidi

Igilinishiche, muqam ansambili yekshenbe bashlan'ghan naxsha, usul muqam kéchilikide deslep qatarning yuqiri derijilik dölet erbabliri hem déplomatiye qatarliq muhim sahe kishilirige oyun körsetken.

Bezi Uyghur sen'etkarlarning inkasigha qarighanda,yéqinqi yillardin buyan xitay da'iriliri, dunyagha Uyghur élining muqimliq hem tereqqiyatini, Uyghur xelqining bay ‏ - bayashat yashawatqanliqini körsitish üchün, Uyghur medeniyet sen'itini teshwiqiy waste qilip pa'al paydiliniwatqan bolup, gerche sen'etkarlar chet'ellerge köp qétim oyun körsitishke oyushturulghan bolsimu, barghan jaylarda Uyghurlar bilen alaqilishish, muxbirlarning so'allirigha öz aldigha jawab bérish, ixtiyari pa'aliyet qilishtin qattiq cheklen'gen, éghir iskenjiler ichide sehnidin bashqa jayda héchqandaq erkinliktin behriman bolalmighan.

Buningdin ilgiriki shinjang muqam ansambili hem naxsha usul ömekliri türkiye, fransiye, gérmaniye, shwétsiye qatarliq jaylarda oyun qoyushqa kelgende xitayning jaylardiki elchixaniliri shu dölettiki Uyghurlargha bélet sétishnimu chekligen.

2003 - Yili shinjang sérk ömiki kanadagha oyun körsetkili chiqqanda, yette neper Uyghur artisining biraqla kanada hökümitidin siyasiy panahliq tilep qélishi, xitay hökümitining Uyghurlargha qaratqan bésim siyasitini dunyagha ashkarilighan idi.