Үрүмчидә муқимлиқ хизмәт йиғини ечилди

2010-Йили ахирлишип, 2011-йили күтүвелиниш алдида турғанда, уйғур аптоном районлуқ коммунистик партийә комитети вә һөкүмәт муқимлиқ хизмәт йиғини чақирди.
Мухбиримиз үмидвар
2010.12.26

Шинхуа агентлиқиниң хәвәр қилишичә, 24- декабир күни чақирилған мәзкур йиғинға аптоном район рәиси нур бәкри риясәтчилик қилған болуп, партком секретари җаң чүншән сөз қилип, "бөлгүнчиликкә қарши қәтий тәврәнмәй күрәш қилип, вәтәнниң бирлики вә дөләтниң аманлиқини қоғдаш" дәп тәкитлигән. У сөзидә йәнә "  раваҗландурушта чиң туруш билән  муқимлиқни икки қоллап тутуш вә иккила қол қаттиқ болуш, зораванлиққа қарши тутуп, қанунни тәрғиб қилиш, тәртипни тәрғиб қилиш лазим" дәп көрсәткән.

Җаң чүншән сөзидә йәнә "шинҗаңниң муқимлиқидики асаслиқ хәтәрниң миллий бөлгүнчилик икәнлики" ни тилға алған. Йиғинда уйғур аптоном райониниң һазирқи вә буниңдин кейинки йеқинқи вақит ичидики хизмәт нишаниниң "иккидин сақлиниш", йәни " кәң көләмлик аммиви вәқәләрниң йүз беришидин сақлиниш, алаһидә хәвплик террорлуқ вәқәлириниң йүз беришидин қәтий сақлиниш" дәп көрситилгән.

Хәвәрдә баян қилинишичә, мәзкур йиғинға уйғур аптоном районлуқ һөкүмәт, партком вә ишләпчиқириш қурулуш армийисиниң рәһбәрлиридин башқа йәнә хитай мәркизий һөкүмитиниң вәкиллири иштирак қилған.

Мәзкур йиғин ечилған бу күнләрдә йәнә  уйғур ели тәвәсидә йүз күнлүк қаттиқ зәрбә бериш һәрикитиму тәң башланған болуп, инкаслардин мәлум болушичә, йеқинда үрүмчидики хан тәңри мәсчитиниң имами мәһмут дамолламниң җиназа намизи вә уни ахирәтликкә узитишқа он миң әтрапида адәмниң қатнишиши үрүмчи һөкүмәт вә сақчи даирилирини җиддийликкә салған икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.