Xitay da'iriliri nyu-york waqti géziti muxbirini xitaydin chiqip kétishke mejburlighanliqini inkar qildi

Xitay tashqi ishlar ministirliqining bir alaqidar xadimi bügün fransiye agéntliqigha bergen jawabida muxbir kiris bukliyning wizisining ret qilinmighanliqini, peqet bezi matériyalliri kemchil bolghanliqtin waqtinche toxtitip qoyulghanliqini éytqan. Emma muxbirning, kiris bukliyning qandaq matériyalliri kemchil iken dégen so'aligha jawab bérelmigen.

Amérikida chiqidighan nyu-york waqti gézitining 10 yildin artuq waqittin béri xitayda turuwatqan muxbiri kiris bukliy 2012-yili ichide muxbirliq wizisini yéngilash üchün bir qanche qétim xitay da'irilirige iltimas sun'ghan bolsimu, jawab alalmighan we netijide düshenbe küni xitay da'iriliri teripidin “Wizisi yéngilanmighan” dégen seweb bilen xitaydin qoghlap chiqirilghan idi.

Xitayda turushluq chet'ellik muxbirlar kulubi bügün bu heqte élan qilghan bayanatida, kiris bukliyge wiza bérilmesliki, tebi'iy halda xitay da'iriliri bu arqiliq nyu-york waqti gézitini jazalimaqchi boluwatamdu dégen so'alni peyda qilidu, dédi we bu ehwaldin intayin epsuslan'ghanliqini bildürdi.

Nyu-york waqti géziti bundin ikki ay ilgiri xitay bash ministiri wén jyabawning 7. 2 Milyard dollar qimmitide a'ile bisati barliqini ashkarilap bir maqale élan qilghandin kéyin, xitay tor qollan'ghuchiliri arisida kompartiye emeldarlirining chirikliki heqqide zor ghulghula peyda bolghan idi.