Чеграсиз мухбирлар тәшкилати хитайниң 2010 ‏- йиллиқ ахбарат әркинлик хатирисини тәнқид қилди

Мәркизи франсийә пайтәхти париждики хәлқара ахбарат әркинлик оргини- чеграсиз мухбирлар тәшкилати пәйшәнбә күни дуняниң 2010 ‏- йиллиқ ахбарат әркинлик әһвали һәққидә доклат елан қилип, ахбарат хадимлириниң бу бир йилда өлтүрүлүш, қолға елиниш, гөрүгә тутулуш, тәһдит вә җисманий һуҗумға учраш, қечип кетишкә мәҗбур болуш қатарлиқ 9 түрлүк зиянкәшликкә учраш һадисиси үстидин баһалаш елип барди.
Мухбиримиз әркин
2010.12.31

Чеграсиз мухбирлар тәшкилатиниң асия ишлири мәсули венсент брусел бу һәқтә тохтилип, ахбарат хадимлириға қаритилған 9 түрлүк зиянкәшликниң ичидә өлтүрүлүш вә гөрүгә елиниш һадисисидин сирт, қалған зиянкәшлик түрлириниң һәммиси хитайда мәвҗут икәнлики, хитайниң ахбарат әркинликини контрол қилиш һәм бесиш җәһәтләрдә дуняда риқабәтчиси йоқлуқини билдүрди. Доклатта әскәртишичә, 2010 ‏- йили йәр шари бойичә 57 нәпәр мухбир өлтүрүлгән, 51 нәпәр мухбир гөрүгә тутулған, 535 нәпәр мухбир қолға елинған яки тутқун қилинған, 1374 нәпәр мухбир җисманий һуҗум вә яки тәһдиткә учриған.

Венсент брусел, 2010 - йили хитайда қолға елинған мухбирларниң 40 дин ашидиғанлиқини, тәхминән 25 мухбирниң җисманий һуҗум вә яки тәһдиткә учриғанлиқини, мухбирларға һуҗум қилғучиларниң көп һалларда сақчи вә яки йәрлик әмәлдарлар икәнликини билдүрди. Хитай даирилириниң ахбарат әркинлики вә қорқмай пикир қилидиған ахбарат хадимлирини бастуруш һәрикити йеқинқи бир қанчә йилдин бери хәлқара кишилик һоқуқ тәшкилатлириниң диққитини қозғап, уларниң хитай кишилик һоқуқ хатириси, демократийә тәрәққияти вә ахбарат әркинликигә болған диққәт нәзирини қозғиған иди. Йеқинда хитай һөкүмитиниң мәркизи радио истансиси мухбири муһәммәтҗан абдуллаға муддәтсиз қамақ җазаси бериши хәлқара кишилик һоқуқ тәшкилатлири вә ахбарат әркинлик тәшкилатлириниң тәнқидигә учриған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.