Нато ливийидики һәрикәтлирини давамлаштурмақчи

Франсийә дөләт мудапиә министири гирард лонкут йиғиндин кейин бәргән баянатида, ливийидики қораллиқ қаршилишишларниң давам қиливатқанлиқини, өткүнчи һөкүмәт тәләп қилмиғучә, натониң ливийидики қораллиқ һәрикәтлириниң давам қилидиғанлиқини билдүрди.

Б б с ниң хәвәр қилишичә, һазир исянчилар казафийниң туғулған йери болған сиртәни қолға алған, әмма җәнубтики бени велид вә әтрапидики районларда тоқунушлар давам қилмақта икән.

Өткүнчи һөкүмәт һазир сиртә шәһиридә қоллашқа еришиш үчүн тиришчанлиқ көрситиватқан болуп, бир қанчә күн ичидә сиртидики қаршилиқ һәрикәтлирини пүтүнләй тинчитидиғанлиқини билдүргән.

Өткүнчи һөкүмәт сиртәни пүтүнләй қолға елип, ливийидә әркинлик елан қилинған күни, өзлириниң истепа берип, мәмликәт бойичә демократик сайлам елип баридиғанлиқи һәққидә вәдә қилған.

Бүгүн йәнә бир яқтин, ливийиниң қачқун лидири казафий милйонлиған ливийә хәлқини “намайиш қилип, өткүнчи һөкүмәтни йоқитиш” қа чақирған. У баянатини сүрийидики бир телевизийә қанили арқилиқ елан қилған болуп, униң һазир нәдә туруватқанлиқи ениқ әмәс.