Nazarbayéfning küy'oghli nazarbayéfni xitay bilen mexpiy kélishim tüzgenlik bilen eyiblidi

Nazarbayéfning sabiq küy'oghli, qazaqistan hökümiti teripidin tutush buyruqi chiqirilip, awstriyide panahlan'ghan siyasiy musapir rahet aliyéf prézidént nursultan nazarbayéfning yéqinda xitaygha qilghan ziyaritide xitay bilen qazaqistanning xitaygha yer ijarige bérishige a'it mexpiy kélishim hasil qilghanliqini eyibligen.
Muxbirimiz ümidwar
2011.03.30

Rusiyining régnum uchur agéntliqining xewer qilishiche, rahet aliyéw öz shexsiy blogida nazarbayéfning yéqinda xitaygha qilghan ziyaritide qazaqistanning xitaygha bir milyon géktar xelq yérini ijarige bérishke maqul bolushqa a'it kélishim tüzgenlikini yazghan.

Régnum uchur agéntliqining xewiride neqil keltürülüshiche, rahet aliyéf nazarbayéfni qazaqistanning xitaylashturush siyasiti yürgüzüwatqanliqi, chünki qazaqistanning uning bixeterlikini kapaletke ige qilghanliqi, nazarbayéfning xeynen we xongkonglarda shexsiy turalghu jaylirigha ige ikenliki bilen tenqid qilghan.

Qazaqistanning xitaygha yer ijarige bérish mesilisi burunla otturigha chiqqan bolup, hetta bu mesile boyiche qazaqistanda naraziliq namayishi yüz bergen idi.

Qazaqistan prézidént a'ilisining sabiq ezasi rahet aliyéf bu qétim özining nazarbayéfqa qaratqan hujumlirini uning xitay bilen bolghan munasiwetlirige baghlighan.

Rahet aliyéf nursultan nazarbayéfning chong qizi dariga nazarbayéwaning éri bolup, u ilgiri qazaqistanning yuqiri menseplirini tutqan hem kéyin qazaqistanning awstriyide turushluq bash elchisi qilip teyinlen'gen we qazaqistan ichki ishlar ministirliqi teripidin jinayi ishlar bilen eyiblinip tutush buyruqi chiqirilghandin kéyin, nazarbayéfqa qarshi öktichilik herikiti sépige qoshulghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.