ئاۋسترىيە نازارابيېفنىڭ سابىق كۈيئوغلى راھەت ئالىيېفنى قايتۇرۇپ بېرىش تەلىپىنى رەت قىلدى

يېقىندا ئاۋسترىيە سوت مەھكىمىسى قازاقىستان پرېزىدېنتى نۇرسۇلتان نازاربايېفنىڭ سابىق كۈيئوغلى، ئاۋسترىيىدە سىياسىي پاناھلىق بىلەن تۇرۇۋاتقان راھەت ئالىيېفنى قازاقىستان ھۆكۈمىتىنىڭ قايتۇرۇپ بېرىش تەلىپىنى رەت قىلدى.
مۇخبىرىمىز ئۈمىدۋار
2011-06-19
Share

رۇسىيىنىڭ «لېنتا.رۇ» تورىنىڭ خەۋەر قىلىشىچە، بۇنىڭدىن تۆت يىل ئىلگىرى ئاۋسترىيە سوتى قازاقىستاننىڭ راھەت ئالىيېفنى قايتۇرۇپ بېرىش تەلىپىنى كۆرۈپ چىققاندىن كېيىن، بۇ تەلەپنى رەت قىلغان بولسىمۇ، ئەمما ئاستانا ئىزچىل تۈردە ئۇنى قايتۇرۇپ كېلىشكە ھەرىكەت قىلماقتا.

مەلۇم بولۇشىچە، يېقىندا قازاقىستان دائىرىلىرى راھەت ئالىيېفقا يەنە قازاقىستاندىكى «نۇربانكا» نىڭ باشقۇرغۇچى خادىملىرىدىن جولدوس تىمىرالىيېف ۋە ئايبار خاسېنوفنى ئۆلتۈرۈشتىن ئىبارەت يېڭى جىنايەتلەرنى ئارتقان. قازاقىستان پرېزىدېنتى بۇ سەۋەب بىلەن قازاقىستان قانۇن دائىرىلىرىنىڭ ئۆلتۈرۈش ۋەقەلىرىگە قاتنىشىش بىلەن ئەيىبلەنگەن كىشىلەرنى قازاقىستانغا قايتۇرۇپ كېلىش ئۈچۈن بارلىق چارىلەرنى قوللىنىشنى بۇيرۇغان.

راھەت ئالىيېف نازاربايېفنىڭ چوڭ قىزى دارىگانىڭ ئېرى بولۇپ، ئىلگىرى ئۇ قازاقىستاندا مەتبۇئات، بىخەتەرلىك ۋە دىپلوماتىيە ساھەلىرىدە يۇقىرى رەھبىرى خىزمەتلەردە بولغان. كېيىن، قازاقىستان ھۆكۈمىتى ئۇنى تۇتۇش بۇيرۇقى چىقارغاندا،ئۇ ئاۋسترىيىدىن سىياسىي پاناھلىق تىلەپ قالغان ھەمدە نازاربايېفنى ئەيىبلەيدىغان تۈرلۈك پائالىيەتلەر بىلەن شۇغۇللانغان.

قازاقىستان ھۆكۈمىتى سىياسىي پاناھلىق تىلىگەن بىر قىسىم ئۇيغۇر ۋە ئۆزبېك مۇساپىرلىرىنى ئىلگىرى كېيىن خىتاي ھەم ئۆزبېكىستانغا قايتۇرۇپ بېرىپ، خەلقئارا ئىنسان ھوقۇقى تەشكىلاتلىرىنىڭ تەنقىدىگە ئۇچرىغان ئىدى.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت