Uniwérsitét oqutquchisi “Kompartiye hoquqtin waz kéchishi kérek” dégenliki üchün nérwa késellikler doxturxanisigha apiriwétildi

Jéjyang ölkisining xangju shehiridiki bir uniwérsitét oqutquchisi ötken hepte ders waqtida, qanundin léksiye sözlewétip, “Junggo kommunistik partiyisi hoquqtin waz kéchishi kérek” dégenliki üchün, ötken jüme küni sheherdiki bir nérwa késellikler doxturxanisigha mejburiy apirip qoyulghan.
Muxbirimiz shöhret hoshur
2012.12.10

Xitay torbetliridiki bu heqtiki uchurlardin melum bolushiche, wang péyjyen isimlik mezkur oqutquchi, derste yuqiriqi sözni qilghandin kéyin, deslepte ders ötüshtin toxtitilghan؛ arqidin inisi we mektep qoghdash xadimliri teripidin nérwa késellikler doxturxanisigha apiriwétilgen. Mezkur oqutquchining dostliri bügün torda pikir bayan qilip, emeliyette wang péyjyenning psixikisining normalliqini, peqet kompartiyige qarshi gep qilghanliqi üchünla, mezkur aqiwetke qalghanliqini ilgiri sürüshmekte.

Bügün radi'oyimizning xitayche bölümi, wang péyjyenning inisigha téléfon qilip, akisi heqqide melumat sorighan. U akisini nérwa késellikler doxturxanisigha mektepning mejburlishi bilen aparmighanliqini éytqan bolsimu, gépining axirida yenila, mektep rehberlirining akisining kelgüsi istiqbaligha ziyankeshlik qilip qoyush éhtimalidin endishe qilidighanliqini ashkarilighan.

Bügünki bu heqtiki xewerlerde bayan qilinishiche, oxshimighan siyasiy qarashtikilerni nérwa késellikler doxturxanisigha apirish jazasi nöwette xitayda muqimliq xizmitide keng türde qolliniwatqan bir tedbir hésablinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.