Nobél edebiyat mukapatining mo yen'ge bérilishi xitay öktichilirining qattiq tenqidige uchridi

Wéy jingshingning ilgiri sürüshiche, mo yén qabiliyetlik yazghuchi bolsimu, biraq uning bezi heriketliri ularni guman'gha salghan. Wéy jingshing, ilgiri mo yénning bashqa yazghuchilar bilen birliship, maw zédonggha medhiye oqughanliqi, uning “Yen'en edebiyat-sen'et yighinida sözligen nutqi” ni qollighanliqini tenqid qilghan.

Shwétsiye akadémiyisi peyshenbe küni bu yilliq nobél edebiyati mukapatining mo yen'ge bérilgenlikini élan qilghandin kéyin, chet'eldiki xitay öktichiliri nobél komitétining bu qararini qattiq tenqid qilghan idi.

Amérikidiki xitay öktichi yazghuchi yü jyé nobél komitétining qararini tenqidlep, “Bu kompartiyining ghelibisi, edebiyatning meghlubiyiti” dégen. Biraq xitay merkizi téléwiziye istansisi “Mo yénning mukapatqa érishkenliki junggoning büyük döletlik ornining étirap qilinishi” dep jakarlighan.

Xitay kompartiyisi merkizi teshwiqat bölümi bolsa mo yénni tebrikligen. Xitay axbarat wasitilirining ilgiri öktichi zat lyu shyawbo nobél tinchliq mukapatigha érishkende héchqandaq xewer bermey, mo yénning mukapatqa érishkenlikini keng xewer qilishi, közetküchilerning diqqitini qozghighan.