Prézidént obama nyuyorkni apet rayoni dep élan qildi

Amérika métri'ologiye tarmaqlirining bildürüshiche, düshenbe küni nyuyorkning jenubiy qismidiki rayonlarda sandiy namliq déngiz borini sa'itige 200 kilométirliq sür'ette algha ilgiriligen. Apet éghir bolghan nyuyorkning manxaton rayonidiki déngiz qirghiqidiki su yüzi 4 métirgha yéqin örligen.

Nyuyork shehiridiki bir qisim kochilarni su bésip ketken. Amérikidiki eng chong sheher hésablinidighan nyuyorkta bir milyon'gha yéqin ahale toksiz qalghan. Sherqiy déngiz qirghiqidiki shitatlarda texminen 6 milyon ahalini we shirketlerni tok bilen teminlesh üzülgen. Apetning aldini élish teyyarliq xizmiti yaxshi ishlen'gini üchün, bu qétimqi yamghurluq boranning apiti eng töwen derijige chüshürülgen. Seyshenbe küni chüshtin kéyin sa'et 1 ge qeder ölgen adem sani 33 ke yetkenliki melum boldi.

Seyshenbe küni etigen sandiy borini ichki quruqluq rayonlirigha yötkilip, shamal küchi sa'itige 120 kilométirgha ajizlighan bolsimu, emma yenila apet élip kélish xewpi éghir bolup, sandiy déngiz borini 31-öktebir charshenbe küni kanadagha yötkilidiken. Sandiy borini yétip kélishtin ilgiri sherqiy déngiz qirghiqidiki shitatlarda düshenbe küni mektep, hökümet organliri, soda saray, shirket qatarliqlarda oqush hem xizmet toxtitildi.

Bu qétimqi boran sewebidin amérika Uyghur uyushmisining 28-öktebir yekshenbe küni ötküzüsh qarar qilin'ghan qurban héytliq pa'aliyitimu emeldin qaldurulghan idi. 29-Öktebir küni toxtitilghan ammiwi qatnash 30-öktebir chüshtin kéyin sa'et 2 de washin'gton shehiri, wérjiniye we merilen shtatlirida eslige keltürüldi.