بۇ ئوبامانىڭ ھازىرغىچە ئىسيانچىلارنى قوللاپ، كازافىيغا قارشى ئېلان قىلغان ئەڭ كەسكىن باياناتى بولۇپ ھېسابلىنىدۇ. پەيشەنبە كۈنى مېكسىكا پرېزىدېنتى فېلىپ چولدېرون بىلەن ئاقسارايدا ئۆتكۈزگەن ئاخبارات ئېلان قىلىش يىغىنىدا لىۋىيىلىك مۇساپىرلارغا ياردەم بېرىش، ئىنسانپەرۋەرلىك كرىزىسى يۈز بېرىشىدىن ساقلىنىش ئۈچۈن بارلىق ئېھتىماللىقلارنى ئويلىشىدىغانلىقىنى تەكىتلىگەن ئوباما، لىۋىيە ھاۋا بوشلۇقىدا ئۇچۇش چەكلەنگەن رايون قۇرۇش ئېھتىماللىقىنى چەتكە قاقمىدى.
ئۇ «مەن گەپنىڭ ئېنىقىنى ئېيتاي، پولكوۋنىك كازافىي ھوقۇقنى تاپشۇرۇشى ۋە ئورنىدىن دەرھال ئايرىلىشى كېرەك» دېدى. لېكىن، ئامېرىكا دۆلەت مۇداپىئە مىنىستىرى روبېرت گەيتىسنىڭ تۈنۈگۈن ئىلگىرى سۈرۈشىچە، لىۋىيە ھاۋا بوشلۇقىدا ئۇچۇش چەكلەنگەن رايون قۇرۇش ئۇرۇش ھەرىكىتى ھېسابلىنىدىغان بولۇپ، بۇنىڭدا لىۋىيە ھاۋا مۇداپىئە سىستېمىسىنى بومباردىمان قىلىشقا توغرا كېلىدىكەن. ئامېرىكا دۆلەت مۇداپىئە مىنىستىرلىقى يېقىندا ئىككى ئامېرىكا ئۇرۇش پاراخوتىنى ئوتتۇرا دېڭىزغا ئەۋەتكەن ئىدى. لېكىن، ئوباما ئامېرىكىنىڭ لىۋىيىلىك ئىسيانچىلارنى ھاۋادىن مۇداپىئە قىلىش قاتارلىق ھەربىي ھەرىكەتكە مۇناسىۋەتلىك كونكرېت مەسىلىلەردە تەپسىلىي توختالمىدى.
ئوبامانىڭ ئەسكەرتىشىچە، ئامېرىكىنىڭ نۆۋەتتىكى دىققەت نۇقتىسى ئۆلۈم-يىتىمنى ئازايتىشقا مەركەزلەشكەن بولۇپ، كرىزىسنىڭ قاتمال ۋەزىيەتكە چۈشۈپ قېلىشىدىن ئەنسىرەيدىكەن. ئۇ «ۋەزىيەتنىڭ قاتمال ئەھۋالغا چۈشۈپ قېلىش، تېخىمۇ كۆپ قان تۆكۈلۈش خەۋپى مەۋجۇت» دەيدۇ. لېۋىيىدىن كەلگەن ئەڭ يېڭى خەۋەرلەردىن مەلۇم بولۇشىچە، بۈگۈن جۈمە كۈنى پايتەخت ترىپولىنىڭ بىر قىسىم مەھەللىلىرىدە جۈمە نامىزىدىن كېيىن، ئاھالىلەر كازافىيغا قارشى نامايىش قىلغان. بەزى خەۋەرلەردە نامايىشچىلار بىلەن كازافىي تەرەپدارلىرى ئارىسىدا توقۇنۇش يۈز بەرگەنلىكى ئىلگىرى سۈرۈلمەكتە.