Obama, kazafiyning derhal texttin chüshüshini telep qildi

Amérika prézidénti barak obama bayanat élan qilip, liwiye rehbiri mu'emmer kazafiyning derhal hoquq tapshurushini we liwiyidin ayrilishini telep qildi.
Muxbirimiz erkin
2011.03.04

Bu obamaning hazirghiche isyanchilarni qollap, kazafiygha qarshi élan qilghan eng keskin bayanati bolup hésablinidu. Peyshenbe küni méksika prézidénti félip choldéron bilen aqsarayda ötküzgen axbarat élan qilish yighinida liwiyilik musapirlargha yardem bérish, insanperwerlik krizisi yüz bérishidin saqlinish üchün barliq éhtimalliqlarni oylishidighanliqini tekitligen obama, liwiye hawa boshluqida uchush cheklen'gen rayon qurush éhtimalliqini chetke qaqmidi.

U “Men gepning éniqini éytay, polkownik kazafiy hoquqni tapshurushi we ornidin derhal ayrilishi kérek” dédi. Lékin, amérika dölet mudapi'e ministiri robért geytisning tünügün ilgiri sürüshiche, liwiye hawa boshluqida uchush cheklen'gen rayon qurush urush herikiti hésablinidighan bolup, buningda liwiye hawa mudapi'e sistémisini bombardiman qilishqa toghra kélidiken. Amérika dölet mudapi'e ministirliqi yéqinda ikki amérika urush paraxotini ottura déngizgha ewetken idi. Lékin, obama amérikining liwiyilik isyanchilarni hawadin mudapi'e qilish qatarliq herbiy heriketke munasiwetlik konkrét mesililerde tepsiliy toxtalmidi.

Obamaning eskertishiche, amérikining nöwettiki diqqet nuqtisi ölüm-yitimni azaytishqa merkezleshken bolup, krizisning qatmal weziyetke chüshüp qélishidin ensireydiken. U “Weziyetning qatmal ehwalgha chüshüp qélish, téximu köp qan tökülüsh xewpi mewjut” deydu. Léwiyidin kelgen eng yéngi xewerlerdin melum bolushiche, bügün jüme küni paytext tripolining bir qisim mehelliliride jüme namizidin kéyin, ahaliler kazafiygha qarshi namayish qilghan. Bezi xewerlerde namayishchilar bilen kazafiy terepdarliri arisida toqunush yüz bergenliki ilgiri sürülmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.