Obama liwiyide turushluq amérika konsulxanisigha qilin'ghan hujumni qattiq eyiblidi

Amérika prézidénti obama charshenbe küni bayanat élan qilip, liwiyide turushluq amérika konsulxanisigha qilin'ghan hujumni qattiq eyiblidi we hujum qilghuchilarning choqum jinayi jawabkarliqqa tartilidighanliqini bildürdi.

2012-09-12
Share


Seyshenbe küni kechte bir top hujumchilar liwiyining bén'ghazi shehirige jaylashqan amérika konsulxanisigha aptomat we granatlar bilen hujum qilghan.

Bu jeryanda elchixana xadimlirini tarqaqlashturush ishlirigha mes'ul boluwatqan bash elchi kris stéwénsni öz ichige alghan jem'iy neper 4 amérika elchixana xadimi qaza qilghan.

Liwiye da'irilirining bildürüshiche, hujum, muhemmed peyghember haqaretlinidighan bir filim tor betliride taralghandin kéyin bir qisim liwiyilikler seyshenbe küni bén'ghazi shehiridiki amérika konsulxanisi aldida naraziliq namayishi qiliwatqanda yüz bergen.

Obama hujum heqqide toxtilip mundaq dédi: amérika qoshma shtatliri bu chékidin ashqan we ademni chöchütidighan hujumni eng küchlük rewishte eyibleydu.

Obama yene mundaq dédi: shuni éniq bildürüp qoyush kérekki biz liwiye hökümiti bilen yéqindin hemkarliship, puqralirimizni öltürgen bu qatillarni choqum jinayi jawabkarliqqa tartimiz.

Prézidént obama yene mundaq tekitlidi: amérika qoshma shtatliri qurulghandin buyan barliq dinlarni hörmet qilip kéliwatqan dölet. Biz bashqilarning diniy étiqadigha töhmet chaplash qilmishlirining hemmisige qarishi.

Héchqandaq bahane - sewebning yuqiriqidek wehshiyliklerni aqlap bolalmaydighanliqini bildürgen prézidént obama yene pütün dunya xelqini bu xil wehshiyliklerge ortaq étiraz bildürüshke chaqirdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet