Хитай һөкүмити өктичи тор язғучилиридин йәнә бир кишини қолға алди

Хитай сақчи даирилири торда мақалә йезип, компартийә һөкүмранлиқини тәнқид қилип келиватқан өктичи язғучилардин рән йүнфейни қолға алған.
Мухбиримиз әркин
2011.03.28

Көзәткүчиләр бу хитай даирилириниң өткән һәптә сичүәнлик өктичи затлардин лю шйәнбинға 10 йиллиқ қамақ җазаси бәргәндин кейин елип барған, өктичиләргә қарши туруш йолидики йәнә бир бастуруш һәрикити, дәп көрсәтмәктә.

Хәвәрләрдин ашкарилинишичә, бу йил 46 яшлардики язғучи рән йүнфейниң 20-февралда чеңду шәһәрлик сақчи даирилири тәрипидин тутқунға учрап, бир айдин бери һечқандақ соал-сорақсиз тутуп турулғандин кейин, дүшәнбә күни рәсмий қолға елинғанлиқи елан қилинған.

Рән йүнфейниң дост -ярәнлириниң ройтерс агентлиқиға ашкарилишичә, даириләр рән йүнфейни “һакимийәтни ағдурушқа қутратқулуқ қилиш” җинайити билән әйиблигән болуп, униң аяли дүшәнбә күни қолға елиш буйруқини тапшурувалған.

“һакимийәтни ағдурушқа қутратқулуқ қилиш җинайити” хитай һөкүмитиниң даим сиясий өктичиләрни бастуридиған әң өткүр қораллириниң бири болуп кәлгән болуп, хитай түрмисидики нобел тинчлиқ мукапати саһиби лю шавбо, уйғур язғучи нурмуһәммәт ясин қатарлиқ мәшһур шәхсләр вә язғучилар хитай җинайи ишлар қануниниң мәзкур маддисиға асасән җазаға тартилған иди.

Хитай әдлийә системисини тәнқид қилғучилар, хитай һөкүмитиниң мәзкур маддидин пайдилинип, “пикир әркинликини җинайи қилмиш орнида җазалаватқанлиқи” ни илгири сүрмәктә. язғучи рән йүнфей сичүәндики бир әдәбий журналниң муһәррири болуп, вәқәдин хәвәрдар кишиләр хитай тәптиш даирилириниң рән йүнфей торда елан қилған мақалиләрни “җинайи пакит” орнида қоллинишидин шүбһиләнмәйдиғанлиқини билдүргән.

Хитай һөкүмити оттура шәрқтики дөләтләрдә партлиған “ясимән гүли” инқилабиниң хитайға тутушуп кетишидин қорқуп, өктичи затларни тутқун қилиш, өктичи тор бәтлирини тақашни җиддийләштүргән иди. Хәвәрләргә қариғанда, хитай даирилири тәрипидин тутқун қилинған вә нәзәрбәнд астиға елинған өктичи затлар 100 дин ашидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.