Xitay hökümiti öktichi tor yazghuchiliridin yene bir kishini qolgha aldi

Xitay saqchi da'iriliri torda maqale yézip, kompartiye hökümranliqini tenqid qilip kéliwatqan öktichi yazghuchilardin ren yünféyni qolgha alghan.
Muxbirimiz erkin
2011.03.28

Közetküchiler bu xitay da'irilirining ötken hepte sichüenlik öktichi zatlardin lyu shyenbin'gha 10 yilliq qamaq jazasi bergendin kéyin élip barghan, öktichilerge qarshi turush yolidiki yene bir basturush herikiti, dep körsetmekte.

Xewerlerdin ashkarilinishiche, bu yil 46 yashlardiki yazghuchi ren yünféyning 20-féwralda chéngdu sheherlik saqchi da'iriliri teripidin tutqun'gha uchrap, bir aydin béri héchqandaq so'al-soraqsiz tutup turulghandin kéyin, düshenbe küni resmiy qolgha élin'ghanliqi élan qilin'ghan.

Ren yünféyning dost -yarenlirining roytérs agéntliqigha ashkarilishiche, da'iriler ren yünféyni “Hakimiyetni aghdurushqa qutratquluq qilish” jinayiti bilen eyibligen bolup, uning ayali düshenbe küni qolgha élish buyruqini tapshuruwalghan.

“Hakimiyetni aghdurushqa qutratquluq qilish jinayiti” xitay hökümitining da'im siyasiy öktichilerni basturidighan eng ötkür qorallirining biri bolup kelgen bolup, xitay türmisidiki nobél tinchliq mukapati sahibi lyu shawbo, Uyghur yazghuchi nurmuhemmet yasin qatarliq meshhur shexsler we yazghuchilar xitay jinayi ishlar qanunining mezkur maddisigha asasen jazagha tartilghan idi.

Xitay edliye sistémisini tenqid qilghuchilar, xitay hökümitining mezkur maddidin paydilinip, “Pikir erkinlikini jinayi qilmish ornida jazalawatqanliqi” ni ilgiri sürmekte. Yazghuchi ren yünféy sichüendiki bir edebiy zhurnalning muherriri bolup, weqedin xewerdar kishiler xitay teptish da'irilirining ren yünféy torda élan qilghan maqalilerni “Jinayi pakit” ornida qollinishidin shübhilenmeydighanliqini bildürgen.

Xitay hökümiti ottura sherqtiki döletlerde partlighan “Yasimen güli” inqilabining xitaygha tutushup kétishidin qorqup, öktichi zatlarni tutqun qilish, öktichi tor betlirini taqashni jiddiyleshtürgen idi. Xewerlerge qarighanda, xitay da'iriliri teripidin tutqun qilin'ghan we nezerbend astigha élin'ghan öktichi zatlar 100 din ashidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.