Пакистандики өмәр уйғур вәхпи паалийәтлирини җанландурмақта

Өткән йилниң ахиридин башлап, пакистандики иккинчи әвлад уйғурлар өмәр уйғур вәхпи намида тәшкилат қурған вә уйғурлар арисида мәдәний - иҗтимаий паалийәтләрни елип бармақта иди. Бу тәшкилат бу йилниң бешида ана тил мәктипи ачқан иди. Йеқинда улар йәнә, мәктәптә компютор мәшқ синипи ечиш үчүн тәйярлиқ хизмәтлирини башлиған.

Өмәр уйғур вәхпи бу йилниң бешида 4 - фиврал ғулҗа вәқәсини, йеқинда йәнә 5 - июл үрүмчи вәқәсини хатириләп паалийәт өткүзгән. Пакистандики уйғур җамаитидин игилигән мәлуматлиримизға қариғанда, пакистандики уйғур яшлириниң мәзкур тәшкилатниң әтрапиға йиғилиши, пакистандики хитай әлчиханисиму һәрикәткә кәлтүргән.

Игилишимизчә, хитайниң пакистан әлчиханиси өмәр уйғур вәхпиниң паалийәтлирини дипломатик йоллар арқилиқ чәклигәндин башқа, түрлүк иҗтимаий вә тәшвиқат вастилири арқилиқму тосушқа урунмақта.

Пакистандики хитай әлчиханиси бу қетимқи һейт мәзгилидә уйғурларни зияпәткә тәклип қилип, роза һейтини тәбриклигән вә өзлириниң уйғурлар үчүн хитайчә мәктәп ечип беридиғанлиқини уқтурған. Һейт зияпитигә аз санда уйғурлар қатнашқан. Зияпәткә қатнашқучиларниң өмәр уйғур вәхпи билән алақә қилмаслиқи тәләп қилинған.

Бу һәқтә пакистандики хитай әлчиханисиға телефон қилғинимизда, әлчихана хадимлири зиярәт қобул қилалмайдиғанлиқини билдүрди.