Yawro asiya yermenkisi mezgilide, ürümchide köktat bazarliri taqilip, yaymikeshler qoghliwétildi

Ürümchide 1-séntebirdin 5-séntebirgiche échilidighan yawro-asiya yermenkisi mezgilide, yermenke échilidighan rayonda jiddiy bixeterlik tedbirliri élinip, yermenke etrapida tijaret qilidighan barliq köktat dukanliri taqaldi.
Muxbirimiz méhriban
2011.08.30

Bazardiki yekke tijaretchilerge dukanlirini bir heptigiche achmasliq uqturushi chüshürülüp, bazardiki yaymikeshler qoghliwétildi.

Birnechche kündin buyan, tor béketliride yawro-asiya yighini hem musulmanlarning roza héyti mezgilide ürümchi weziyitining jiddiyleshkenliki heqqide yézilghan naraziliq inkasliri barghanche köpeygen.

Sinna tor békitidiki bir inkasta ürümchi weziyiti heqqide “Hökümet yermenke achimiz dep, roza héyt mezgilide puqralarni köktatsiz qoyuwatidu.

Amanliq dep ürümchi asminida tik uchar nazaret qiliwatidu. Kochida mangghanlarni nazaret qilip, puqralarni öyde olturushqa zorlawatidu.

Kochigha qaraydighan dérizilerni taqashqa buyrup, puqralarni dimiq issiqta öltürey dewatidu. Ejeba hökümet bundaq qilghanséri puqralarning naraziliqi küchiyip, yene weqe chiqishidin qorqmamdikine?” déyilgen.

Ürümchidin radi'omiz ziyaritini qobul qilghan puqralarning bildürüshiche, ürümchi yermenkisi échiliwatqili on nechche yil bolghan bolsimu, emma bu yil hökümet da'irilirining yermenke mezgilide bu qeder qattiq bixeterlik tedbirliri élip, puqralarning normal pa'aliyetlirige cheklime qoyushi, ürümchi ahaliside bixeterlik tuyghusi emes, eksiche téximu zor wehime peyda qilip, sheher weziyitide herqandaq waqittikidinmu jiddiy keypiyat shekillendürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.