Өзбекистан 1-январдин башлап таҗикистанни газ билән тәминләшни пүтүнләй кесип ташлиған
2012.12.31
Бу өзбекистанниң мушу бир йил ичидә таҗикларни газ билән тәминләшни тунҗи қетим үзүп қоюши әмәс. Өзбекистан 2012-йили 4-айда бир қетим газ билән тәминләшни тохтитип қойған иди. Бирақ бу қетим оттура асияниң қәһритан соғуқида тохтитип қоюлди. Анализчиларниң илгири сүрүшичә, таҗикистан һәр йили бир милярд 200 милйон купметир газға еһтияҗлиқ болсиму, бирақ өзбекистан 2012-йили таҗикларни 133 милйон купметир газ билән тәминлигән вә һәр миң күп метирини 300 доллардин сатқан.
Өзбекистан өткән сәйшәнбә күни таҗикларни газ билән тәминләшни тохтитидиғанлиқини елан қилған. Таҗикистан баш министири ақил ақилоф өзбекистанни дәрһал сөһбәт өткүзүшкә чақирған иди. Бирақ таҗикистан тәбиий газ ширкити баянатчисиниң франсийә ахбарат агентлиқиға билдүрүшичә, өзбекистан тәрәп ақилофниң чақириға һечқандақ җаваб қайтурмиған. Газ билән тәминләшни немишқа тохтитип қойғанлиқиғиму һечқандақ чүшәнчә бәрмигән.
Өзбекистан илгири газ йитиштүрәлмәйватқанлиқини илгири сүрүп, 1-январ таҗикистан билән болған тохтам вақти тошқандин кейин, газ билән тәминләш дәрһал тохтитилидиғанлиқини елан қилған. Бирақ анализчиларниң илгири сүрүшичә, өзбекистанниң һәрикити таҗикистанниң аму дәрясини боғуп, су амбери вә електр истансиси қурулуши елип бериватқанлиқидин өч елишни мәқсәт қилған.