Pakistan qisimliri bilen talibanlar otturisidiki jengde musapirlar köpeymekte
Muxbirimiz weli
2009.05.09
2009.05.09
Pirzubar shah, salman mes'ud, kartotta gallarning islam'abadtin, mardandin we kabuldin yollighan xewerlirige qarighanda, jüme küni pakistan qisimliri pakistan paytextining gherbiy shimal teripidiki keng rayonlarni kontrol qiliwalghan talibanlargha qarshi élip barghan jiddiy jengdin kéyin, swat rayonidin yurt - makanlirini tashlap jenubqa qarap éqiwatqan musapirlar sani 300 mingdin ashidu. Talibanlar hazirmu pakistan paytextige yéqin jaydiki min'gora, buner dégen jaylarni kontrol qilip turmaqta.
Xewerde éytilishiche, yurtini tashlap qachqan bir ayal musapir muxbirgha 'hökümet qisimliri bilen talibanlar öz - ara dost, ular bir - birini öltürmeydu, hökümet qisimlirining bombisi bizge tagh tereptin kéliwatidu, talibanlarning oqi sheher tereptin kéliwatidu, bizde hazir jandin bashqa héchnéme qalmidi' dep derd éytqan.
Birleshken döletler teshkilatning musapirlargha yardem qilish xadimlirining éytishiche, pakistanda hazir musapirlar qoshuni kündin - kün'ge köpiyiwatidu. Bu qétim yurtliridin musapir bolup chiqqan 200 mingdin artuq adem hazir, buningdin burunqi yérim milyon musapirlar sépige qétildi. B d t ning insanperwerlik yardem bérish xadimliri hazir pakistan musapirlirigha béridighan yardemni ülgürtelmeywatidu.
Pakistan qisimlirining générali atar abbasning rawalpindidiki qumandanliq shitabida bayan qilishiche, pakistan qisimliri bu qétimqi jengde talibanlardin 140ni öltürgen, pakistan eskerliridin 7 si chiqim bolghan. Emma hazir bu uchurni ispatlaydighan yene bashqa menbe'e yoq.