Pakistan hökümiti gwadar portini xitayning bashqurushigha ötküzüp bérishke maqul boldi

“Hindistan waqit géziti” ning ilgiri sürüshiche, pakistanning qarari hindistanni bi'aram qilishi mumkin. Pakistan uchur ministiri qemer zaman kayraning bildürüshiche, pakistan ichki kabinéti charshenbe küni yighin échip, sin'gaporning gwadar portini xitay chet'el port cheklik shirkitige ötküzüp bérishini testiqlighan.

Xitay ilgiri ereb déngizigha chiqidighan mezkur portning qurulushida muhim rol oynighan we 250 milyon dollarliq mezkur port qurulushining 75% meblighini chiqarghan.

Bezi analizchilar xitayning qeshqer shehirini tereqqiy qildurup, qonjirap arqiliq mezkur sheherni gwadar portigha tash yol we tömür yol arqiliq tutashturush, bu arqiliq ottura sherq ellirige chiqish pilani barliqini ilgiri sürgen idi. Qemer zaman kayra, xitayning gwadar portigha dawamliq meblegh sélip, uning meshghulat iqtidarini ashuridighanliqini bildürgen.

Analizchilar xitayning gwadar portini bashqurush hoquqigha érishishi muhim ehmiyetke ige, xitay mezkur port arqiliq ottura sherqning néfitini qeshqerge yetküzeleydu, dep körsetmekte.

Pakistan dölet mudapi'e ministiri muxter bultur 5‏-ayda xitayning gwadar portini ötküzüwélishqa qoshulghanliqi, eger xitay gwadar herbiy baza qursa, pakistan hökümiti“Minnetdar” bolidighanliqini bildürgen. Xitayning pakistanda herbiy baza qurup, qebililer rayonidiki sherqiy türkistan islamiy qoralliq küchlirige taqabil turush pilani bar-yoqluqi izchil diqqet qozghap kelgen.