Pakistan prézidénti zerdari xitayning Uyghurlargha qarshi kürishide téximu zich hemkarlishidighanliqini bildürdi

Chet'el axbarat wasitiliri bügünki xewerliride zerdarining xitay hökümiti qeshqer “Yéngi bazar weqesi” de hayatidin ayrilghan Uyghur qarshiliq körsitish küchlirining pakistanda terbiyilen'genlikini ilgiri sürüp, az kem bir aydin kéyin bu sözlerni qilghanliqigha diqqet qilghan. Zerdari peyshenbe küni bashlinidighan “Yawro-asiya yermenkisi” ge qatnishish üchün ürümchige kelgen idi.

“Xelq” gézitining charshenbe küni élan qilghan xewiride bildürüshiche, zerdari islam'abadning her qandaq térrorluqqa qarshi turidighanliqini eskertip, “Pakistan xitay bilen térrorluqqa qarshi téximu keng hemkarlishidu we térrorchi küchlerge birlikte zerbe béridu” dégen.

Xewerde yene jang chünshyenning “Térrorluq insaniyetning ortaq düshmini, biz pakistanning bu mesilide bizni qollighanliqigha rehmet éytimiz” dégenliki bildürüldi. Biraq dunya Uyghur qurultiyi zerdarini semimiyetsizlik bilen tenqidlep, pakistanni xelq'ara ehdinamilerge hörmet qilishqa chaqirdi.

D u q bayanatchisi dilshat rishit pakistanning bu mesilide pursetpereslik qiliwatqanliqini eskertip, “U sherqiy türkistan musteqilliq herikitini basturushta xitaygha hemkarlishiwatqan bilen, keshmirde hindistan'gha qarshi térrorluq heriketlirini qollawatqanliqi” ni bildürdi.

Pakistan qeshqer “Yéngi bazar weqesi”din kéyin besh Uyghurni xitaygha ötküzüp bérip, xelq'ara kishilik hoquq teshkilatlirining tenqidige uchrighan.