Кеңәш палата әзалири һоқуқ паалийәтчиси гав җишиңни қоюп беришни тәләп қилди

Америка кеңәш палатасиниң барбара бокс, җон корниң қатарлиқ икки нәпәр әзаси пәйшәнбә күни хитай һөкүмитини кучадики бир түрмигә қамалған кишилик һоқуқ паалийәтчиси гав җишиңни дәрһал қоюп беришкә чақиридиған бир қарар лайиһиси оттуриға қойған.
Мухбиримиз әркин
2012-09-14
Share

Қарар лайиһисидә йәнә, хитай һөкүмитидин әгәр гав җишиңниң халиса, униң америкиға аяли вә бала-чақилири билән җәм болушиға йол қоюш тәләп қилинған. Гав җишиң илгири қолға елинған кишилик һоқуқ паалийәтчилириниң вә фалунгоңчилар муритлириниң адвокатлиқини қилип нам чиқарған иди.

Хитай һөкүмити 2005‏-йилдин башлап, униң адвокатлиқ кинишкисини бикар қилған. У бу җәрянда көп қетим қолға елинған вә из-дерәксиз ғайиб болған, тән җазаси вә һәрхил қийин-қистақларға учриған иди.

Даириләр 2011‏-йили 12-айда униңға берилгән 3 йиллиқ қамақ җазасини кечиктүрүп иҗра қилиш бикар қилинғанлиқини елан қилип, униң кучадики бир түрмигә қамалғанлиқини билдүргән иди.

Америкидики "әркинлик шуан" намлиқ кишилик һоқуқ тәшкилатиниң қурғучилиридин бири, гав җишиңниң хәлқара қанун мәслиһәтчиси җәрит генсер пәйшәнбә күни баянат елан қилип, барбара бокс вә җон корниң оттуриға қойған қарар лайиһисини қарши алидиғанлиқини билдүргән.

У йәнә, хитай һөкүмитигә чақириқ қилип, гав җишиңниң дәрһал вә шәртсиз қоюп берилишини тәләп қилған. Җәрит генсер баянатида әскәртип: бу қарар лайиһиси гав җишиңни бир адвокат болуш сүпитидә хитайдики мәзлумларға хизмәт қилғанлиқи үчүн җазалашниң хәлқара қанунға ашкара хилаплиқ қилиш икәнликини етирап қилғанлиқ, дәп көрсәткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт