ئۈرۈمچىدە 'ئايروپىلان پارتلايدۇ' دەپ يالغان خەۋەر تارقاتقان جاۋابكارغا ھۆكۈم ئېلان قىلىندى

ئۈرۈمچىدىكى بىر سوت 11 - نويابىر سوت ئېچىپ، "ئايروپىلان پارتلايدۇ" دەپ، يالغان خەۋەر تارقىتىپ، ساراسىمە پەيدا قىلغان ما فامىلىلىك جاۋابكارنى بىر يېرىم يىللىق قاماق جازاسىغا ھۆكۈم قىلغان.
ﻣﯘﺧﺒﯩﺮﯨﻤﯩﺰ ﺟﯜﻣﻪ
2010.10.18
Share on WhatsApp
Share on WhatsApp

شىنخۇا ئاگېنتلىقىنىڭ 18 - نويابىردىكى خەۋىرىدە كۆرسىتىشىچە، سوت ئۈرۈمچى شەھىرى يېڭىشەھەر رايونلۇق سوتتا ئېچىغان. مەلۇم بولۇشىچە، جاۋابكار ما يىڭباۋ، بۇ يىل 11 - ئاۋغۇست ئۈرۈمچىدىن كۈنمىڭگە قاراپ يولغا چىققان B 737 - تىپلىق يولۇچىلار ئايروپىلانىنى " پارتلاپ كېتىدۇ" دەپ، گەپ تارقاتقان ۋە ئايروپىلاندا جىددىي ساراسىمە پەيدا قىلغان ئىكەن.

خىتاي مۇناسىۋەتلىك خادىملىرى خەۋەرنى ئالغاندىن كېيىن، ئايروپىلانى قوندۇرۇپ تەكشۈرگەن. نەتىجىدە خەۋەرنىڭ يالغانلىقى ئىسپاتلانغان.

ھالبۇكى، بۇ يىل 11 - ئاۋغۇست خىتاي ئاخباراتلىرىدا بۇ ھەقتە تەپسىلىي خەۋەر بېرىلمىگەن ئىدى.

شىنخۇا ئاخباراتىدا 18 - نويابىر بېرىلگەن خەۋەردىمۇ، ئايروپىلاننىڭ قايسى شەھەرگە قوندۇرۇلغانلىقى، قانداق تەدبىرلەرنىڭ ئېلىنغانلىقى، ما يىڭباۋنىڭ قانداق قولغا ئېلىنغانلىقى ۋە ئۇنىڭ كىملىكى ئېنىق كۆرسىتىلمىگەن.

خىتاي دائىرىلىرى 19 ياشلىق بىر ئۇيغۇر قىزىنىڭ، 2008 - يىل مارتتا ئۈرۈمچىدىن خىتاينىڭ بېيجىڭ شەھىرىگە قاراپ ئۇچقان بىر يولۇچىلار ئايروپىلانىنى پارتلىتىشقا ئۇرۇنۇپ، مەغلۇپ بولغانلىقىنى خەۋەر قىلغان ئىدى. ئەمما، ئۇلار بۇ قىزنىڭ كېيىنكى ئەھۋالىنى ئاخباراتتىن يوشۇرغان.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.