Президент обама нутуқ сөзләп, пәләстин-исраилийә мәсилисини һәл қилиш чариси 1967‏-йилдики чеграни асас қилиши керәк деди

Бу америка һөкүмитиниң тунҗи қетим пәләстин‏-исраилийә мәсилисидә 1967-йилдики чеграни асас қилиш керәкликини рәсмий оттуриға қоюшидур.

Исраилийә 1967-йилидики “6 күнлүк уруш”та шәрқий еруссалим вә ғәрбий қирғақтики пәләстин земинлирини игиливалған. Лекин обама пәләстинликләрни агаһландуруп, америка -исраилийә достлуқиниң тәврәнмәс икәнликини, “исраилийиниң мәвҗутлуқини қанунсизлаштуруш тиришчанлиқи”ниң мәғлубийәткә учрайдиғанлиқини билдүрди.

Президент обама йәнә, мисир, тунис, ливийә, бәһрәйин, йәмән қатарлиқ әрәб әллиридики демократик хәлқ һәрикәтлири һәққидә тохтилип, хәлқ әркинлик вә кишилик һоқуқ үчүн орнидин дәс турғанда бастуруш һәрикити ақмайду, дәп көрсәтти.

У, йирақтики оттура шәрқ вә шималий африқида йүз бәргән вәқәләрниң америка үчүн интайин муһим әһмийәткә игә икәнликини әскәртип, өткәнки 6 ай җәрянида әрәб дунясида йүз бәргән вәқәләрдин шу нәрсә мәлум болдики, хәлқниң әркинликкә болған узун йиллиқ тәшналиқи ахири истибдат һөкүмранларни ағдуруп ташлиғанлиқини билдүрди.

Обама йәнә, америка армийисиниң бин ладенни өлтүрүши террорчиларға берилгән қаттиқ зәрбә икәнликини, бин ладенниң шеһид әмәс, бәлки бир қатил икәнликини әскәртип, бин ладен өлүштин бурунла униң бузғунчилиқ вә вәйранчилиқни қиблинамә қилған идеологийиси әрәб дунясида өзиниң җәлп қилиш күчини йоқатқанлиқини тәкитлиди.